Qirg‘iziston prezidenti vazifasini bajaruvchi Sadir Japarov qonunchilikka o‘zgartirish kiritilsa, prezident saylovlarida ishtirok etishga tayyorligini aytdi. Bu haqda RIA Novosti “Rossiya 24” telekanaliga asoslanib xabar bermoqda.
Qirg‘izistonning “Prezident saylovi to‘g‘risida”gi qonuniga muvofiq prezident vazifasini bajaruvchi shaxs mamlakat prezidentligiga o‘z nomzodini qo‘ya olmaydi.
“Ayni paytda parlamentda prezident va parlament saylovlari to‘g‘risidagi qonunchilikka tuzatishlar kiritish borasida hujjat tayyorlanmoqda. Agar qonundagi ushbu o‘zgartirishlar natijasida saylovda ishtirok etishga ruxsat berilsa, men (saylovda) qatnashman”, – dedi Japarov “Rossiya 24” telekanaliga bergan intervyusida.
Japarovning so‘zlariga ko‘ra, bu haqda gapirishga hali erta. Chunki bu masala bo‘yicha qaror hali qabul qilinmagan.
“Ota-makon” fraksiyasi yetakchisi Omurbek Tekebayev ham ushbu masalaga izoh berib o‘tgan.
“Agar Sadir Japarov davlat rahbari vazifasini bajaruvchi funksiyalarini Jo‘qorg‘i Kenges spikeriga topshirsa, saylovlarda ishtirok etish huquqiga ega bo‘ladi. Shuningdek, u saylovlarda ishtirok etish paytida bosh vazirlik vazifasini to‘xtatib turishi kerak”, – dedi Tekebayev.
Eslatib o‘tamiz, 15-oktabr kuni Jeenbekov 10 kun davom etgan norozilik namoyishlaridan keyin Qirg‘iziston prezidentligi lavozimidan iste’fo bergandi. 16-oktabr kuni parlament majlisida qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etgan. Yakunda bosh vazir Sadir Japarov prezident vazifasini bajaruvchiga aylandi.
Dastlabki ma’lumotlarga ko‘ra, prezidentlikka saylovlar 17-yanvar kuni bo‘lib o‘tadi.
Izoh (0)