Shveysariya hukumati 19-oktabr kunidan barcha jamoat joylarida majburiy niqob taqishni joriy qildi, deb xabar bermoqda “RBK”. Bu COVID-19 koronavirus infeksiyasiga chalinganlar sonining o‘sishi tufayli ko‘rilgan choradir.
Bunda gap, xususan, do‘konlar, savdo markazlari, banklar, pochta bo‘linmalari, kutubxonalar, kinoteatrlar, teatrlar va konsert zallari, mehmonxonalar (xonalardan tashqari), restoranlar, barlar, kasalxonalar, diniy muassasalar haqida bormoqda. Shuningdek, niqob rejimiga jamoat transportida, vokzallarda, aeroportlarda, avtobus va tramvay bekatlarida rioya qilish kerak. Bunday talab 12 yoshdan kichik bolalar uchun amal qilmaydi.
Shu kundan e’tiboran, Shveysariya Federal kengashi jamoat joylarida 15 nafardan ortiq odamning guruh bo‘lib to‘planishini taqiqladi. Bundan tashqari, restoran, bar va tungi klublarda yegulik va ichimliklarni faqat o‘tiradigan joylarda iste’mol qilishga ruxsat berildi. Ish beruvchilarga xodimlarini masofadan ishlash rejimiga o‘tkazish tavsiya etildi.
Shveysariya prezidenti Simonetta Sommaruga mamlakatda COVID-19 tarqalishi bilan bog‘liq vaziyatni jiddiy deb atadi va hukumat keyinroq yangi choralarni joriy qilishi mumkinligini ham aytdi.
Jons Hopkins universiteti ma’lumotlariga ko‘ra, pandemiya boshidan buyon Shveysariyada koronavirusga chalinish bilan bog‘liq 74,4 mingta holat qayd etilgan, 2,1 ming kishi vafot etgan.
16-oktabr kuni mamlakatda 3105 kishida kasallik aniqlandi, bu bir kecha-kunduz uchun rekord raqam hisoblanadi.
Avvalroq Avstriya va Belgiya tashqi ishlar vazirlarida COVID-19 aniqlangani xabar berilgan edi. Avstriya tashqi ishlar vaziri Aleksandr Shallenberg virusni 12-oktabr kuni Lyuksemburgda bo‘lib o‘tgan Yevropa ittifoqi Tashqi ishlar kengashi majlisida Belgiya TIV rahbari Sofi Vilmes bilan muloqot qilishi oqibatida yuqtirib olgan bo‘lishi mumkin.
Eslatib o‘tamiz, Fransiyada o‘tgan bir kecha-kunduzda 32,4 mingdan ortiq kishi koronavirusga chalindi, bu rekord ko‘rsatkich hisoblanadi. Avvalroq Germaniya prezidenti Frank-Valter Shtaynmayer 17-oktabr kuni tan soqchisida koronavirus aniqlanganidan keyin karantinga olingan edi.
Izoh (0)