Қирғизистон президенти вазифасини бажарувчи Садир Жапаров қонунчиликка ўзгартириш киритилса, президент сайловларида иштирок этишга тайёрлигини айтди. Бу ҳақда РИА Новости «Россия 24» телеканалига асосланиб хабар бермоқда.
Қирғизистоннинг «Президент сайлови тўғрисида»ги қонунига мувофиқ президент вазифасини бажарувчи шахс мамлакат президентлигига ўз номзодини қўя олмайди.
«Айни пайтда парламентда президент ва парламент сайловлари тўғрисидаги қонунчиликка тузатишлар киритиш борасида ҳужжат тайёрланмоқда. Агар қонундаги ушбу ўзгартиришлар натижасида сайловда иштирок этишга рухсат берилса, мен (сайловда) қатнашман», – деди Жапаров «Россия 24» телеканалига берган интервьюсида.
Жапаровнинг сўзларига кўра, бу ҳақда гапиришга ҳали эрта. Чунки бу масала бўйича қарор ҳали қабул қилинмаган.
«Ота-макон» фракцияси етакчиси Омурбек Текебаев ҳам ушбу масалага изоҳ бериб ўтган.
«Агар Садир Жапаров давлат раҳбари вазифасини бажарувчи функцияларини Жўқорғи Кенгес спикерига топширса, сайловларда иштирок этиш ҳуқуқига эга бўлади. Шунингдек, у сайловларда иштирок этиш пайтида бош вазирлик вазифасини тўхтатиб туриши керак», – деди Текебаев.
Эслатиб ўтамиз, 15 октябрь куни Жээнбеков 10 кун давом этган норозилик намойишларидан кейин Қирғизистон президентлиги лавозимидан истеъфо берганди. 16 октябрь куни парламент мажлисида қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этган. Якунда бош вазир Садир Жапаров президент вазифасини бажарувчига айланди.
Дастлабки маълумотларга кўра, президентликка сайловлар 17 январь куни бўлиб ўтади.
Изоҳ (0)