Ozarbayjon prezidenti Ilhom Aliyev Qorabog‘dagi 13 ta qishloq nazorat ostiga olinganini ma’lum qildi

Ozarbayjon armiyasi Tog‘li Qorabog‘dagi 13 ta qishloqni o‘z nazorati ostiga oldi. Bu haqda mamlakat prezidenti Ilhom Aliyev o‘zining Twitter’dagi sahifasi orqali ma’lum qildi.

Uning so‘zlariga ko‘ra, gap Jabroil tumanidagi Sultonli, Amirvorli, Mashanli, Hasanli, Alikeyxonli, Qumloq, Gajili, Geyarchinveysalli, Niyozqullar, Kechal Mammedli, Shahvelli, Hoji Ismoil, Isagli qishloqlari haqida ketmoqda.

Shuningdek, Aliyev Armaniston tomonini Ozarbayjon aholi punktlari va jangovar pozitsiyalariga og‘ir qurollardan o‘qqa tutish va yarashuv sulhini buzishda ayblagan. Uning aytishicha, ushbu o‘t ochishlar oqibatida odamlar halok bo‘lgan, Ozarbayjon javob harakatlarini amalga oshirgan.

Armaniston Mudofaa vazirligining matbuot kotibi Shushan Stepanyan o‘zining Facebook’dagi sahifasiga yozishicha, Ozarbayjon Qurolli kuchlari BTR va tanklardan foydalangan holda janubiy yo‘nalish bo‘yicha hujum boshlagan. Uning so‘zlariga ko‘ra, hujum to‘xtatilgan, ozar qo‘shinlari esa bir necha kilometrga surib tashlangan.

Avvalroq Turkiya Tog‘li Qorabog‘dagi mojaroni oldindan rejalashtirganlikda ayblangan edi.