Озарбайжон армияси Тоғли Қорабоғдаги 13 та қишлоқни ўз назорати остига олди. Бу ҳақда мамлакат президенти Илҳом Алиев ўзининг Twitter’даги саҳифаси орқали маълум қилди.
Унинг сўзларига кўра, гап Жаброил туманидаги Султонли, Амирворли, Машанли, Ҳасанли, Аликейхонли, Қумлоқ, Гажили, Геярчинвейсалли, Ниёзқуллар, Кечал Маммедли, Шаҳвелли, Ҳожи Исмоил, Исагли қишлоқлари ҳақида кетмоқда.
Шунингдек, Алиев Арманистон томонини Озарбайжон аҳоли пунктлари ва жанговар позицияларига оғир қуроллардан ўққа тутиш ва ярашув сулҳини бузишда айблаган. Унинг айтишича, ушбу ўт очишлар оқибатида одамлар ҳалок бўлган, Озарбайжон жавоб ҳаракатларини амалга оширган.
Арманистон Мудофаа вазирлигининг матбуот котиби Шушан Степанян ўзининг Facebook’даги саҳифасига ёзишича, Озарбайжон Қуролли кучлари БТР ва танклардан фойдаланган ҳолда жанубий йўналиш бўйича ҳужум бошлаган. Унинг сўзларига кўра, ҳужум тўхтатилган, озар қўшинлари эса бир неча километрга суриб ташланган.
Аввалроқ Туркия Тоғли Қорабоғдаги можарони олдиндан режалаштирганликда айбланган эди.
Мавзуга доир: Боку Ганжа шаҳрига берилган ракета зарбалари оқибатида 12 киши ҳалок бўлганини маълум қилди
Изоҳ (0)