Tog‘li Qorabog‘da yuzaga kelgan mojaroning keskinlashuvi Turkiya tomonidan qasddan rejalashtirilgan va provokatsiya qilingan. Bu haqda “Kommersant” nashri o‘zining harbiy-diplomatik manbasiga tayanib, xabar berdi.

Foto: AFP

“So‘nggi bir necha oyda Anqara Bokuga har tomonlama siyosiy-diplomatik, razvedka va harbiy-texnika borasida ko‘maklashishni va’da bergan holda harbiy harakatlarni amalga oshirishga undadi”, — deyiladi xabarda.

Ma’lumotlarga ko‘ra, iyul—avgust oylarida Ozarbayjon hududida o‘tkazilgan turk—ozar o‘quv mashg‘ulotlaridan so‘ng mamlakatda qolgan Turkiya qurolli kuchlari guruhiga Tog‘li Qorabog‘da operatsiyani o‘tkazish va rejalashtirishda muvofiqlashtiruvchi hamda yo‘naltiruvchi rolini o‘ynash topshirilgan.

“Gap 600 nafar harbiy xizmatchi, jumladan, 200 kishidan iborat batalyon taktik guruh, 50 nafar instruktor, Bokudagi 90 nafar harbiy maslahatchi, Gabala aviabazasidagi uchish-texnik tarkibining 120 nafar vakili, Dallyar aerodromidagi uchuvchisiz boshqariladigan uchish vositalarining 20 nafar operatori, Yevlax aerodromidagi 50 nafar instruktor, 4-armiya korpusidagi 50 nafar instruktor va Haydar Aliyev nomidagi harbiy bilim yurti va harbiy-dengiz bazasidagi 20 kishi haqida ketmoqda”, — deb yozadi nashr.

Manbaning ta’kidlashicha, ushbu guruh 18 ta BMP, bitta zalp o‘t ochish reaktiv tizimi, o‘nta avtotexnika va 34 ta aviatsiya texnikasini (6 ta samolyot, 8 ta vertolyot, 20 tagacha dron) o‘z ichiga olgan bo‘lib, Qorabog‘ hududidagi harbiy razvedka ishlarini ta’minlagan.

Qayd etilishicha, sentabr—oktabr oylarida Turkiyaning harbiy-transport aviatsiyasi Ozarbayjonga parvozlarni oshirgan (tranzit Gruziya orqali). Ushbu samolyotlar shaxsiy tarkibni, jangovar o‘q-dorilar va tibbiyot vositalarini yetkazgan.

Gazetaning yozishicha, jangovar harakatlar avj olgan 28—30-sentabr kunlari Ozarbayjonga qo‘shimcha harbiy maslahatchilar, xususan, Turkiya mudofaa vaziri Xulusi Akar va quruqlikdagi qo‘shinlar qo‘mondoni Umit Dyundar yetib kelgan.

Eslatib o‘tamiz, Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.