Apple kompaniyasi 13-oktabr kuni o‘tkazilgan taqdimotida HomePod mini “aqlli” kolonkasini taqdim etdi. Hamyonbop va ixcham qurilmani 6-noyabrdan boshlab 100 dollar evaziga buyurtma qilish mumkin, deb xabar beradi IXBT.
HomePod sifatli audiotizim bilan birga, ovozni ko‘tarishga yordam beradigan S5 protsessori bazasida yaratilgan. Apple HomePod mini ovozli tizimini Computational audio deb atagan — soniyasiga yuz marotabadan ortiq hisoblangan tovush avtomatik ravishda optimallashtirilib, sifatli ovozni taqdim etadi. Agarda bitta HomePod mini’ning sifati yetmasa, ikkinchisini xarid qilib, ulardan stereojuftlik hosil qilish mumkin.
HomePod mini UWB (Ultra Wideband) aloqali U1 chipini qo‘llab-quvvatlaydi — kompaniya unga katta umid bildirmoqda. UWB’ni yaqin orada iMac’dan tortib Apple Watch’gacha bo‘lgan barcha qurilmalar qo‘llab-quvvatlashni boshlaydi. Xususan, hozirda Apple Watch Series 6’da UWB mavjud.
Tabiiyki, HomePod mini Siri ovozli yordamchisiga ega bo‘lib, u ancha tezlashgan. Interkom nomli yangi funksiya turli foydalanuvchilar turli HomePod mini’lar orqali o‘zaro muloqot qilishiga imkon beradi. Masalan, ota-onalar mehmonxonadagi HomePod mini orqali bolani kechki ovqatga chaqirishi mumkin, bunda “taklif” bolaning xonasidagi HomePod mini orqali yetkaziladi. Interkom funksiyasi Apple’ning boshqa qurilmalari — iPhone smartfonlari va hatto CarPlay tizimi orqali ishlay oladi. Shuningdek, HomePod mini yordamida “aqlli” uy tizimini boshqarish mumkin.
Avvalroq Apple iPhone 12’ni taqdim etgani, lineykadagi barcha smartfonlar 5G aloqa tarmog‘ini qo‘llab-quvvatlashi to‘g‘risida xabar berilgandi.
Izoh (0)