Qidiruv giganti — Google avgustning boshida Pixel 4a smartfonini taqdim etganida keyinroq uning 5G versiyasini ham chiqarishini aytgan edi. 3-oktabr kuni Pixel 4a 5G hamda mutlaqo yangi Pixel 5 smartfonlari namoyish etildi. “Terabayt.uz” smartfonlar haqida batafsil tahlilni chop etdi.
Bu ikki model qadog‘idanoq Android 11 operatsion tizim talqini bilan taqdim etilgan ilk smartfonlardir. Ularning afzalliklari qatorida yana ixchamligi va OLED-ekranga ega ekanligini ta’kidlash mumkin. Qolgan jihatlariga ko‘ra ular… oddiy, o‘rtacha smartfonlar bo‘lib chiqdi, hattoki Google Pixel 5 modeli ham flagman xususiyatlariga ega emas!
Umumiy jihatlari
Pixel 4a 5G modeli ham, Pixel 5 ham Qualcomm Snapdragon 765G protsessori bazasiga qurilgan. Mazkur chipset samaradorlik bo‘yicha rekordga da’vo qilmaydi, ammo beshinchi avlod uyali aloqa standartini qo‘llovchi Snapdragon X52 modemini hamda Titan M xavfsizlik modulini o‘zida jamlagan.
Google bu ikkita smartfonini ayni bir xil kameralar jamlanmalari bilan ham ta’minlagan. Bosh kamera qo‘shaloq bo‘lib, undagi 12,2 megapikselli asosiy sensor fazaviy fokuslash hamda qo‘shma (optik va elektron) barqarorlashtirish tizimlariga ega. Bu datchikka difragmasi F/1,7 hamda ko‘rish burchagi 77 darajali obyektiv biriktirilgan. Ikkinchi modul esa 16 megapikselli aniqlikka ega; unda F/2,2 diafragmali va ko‘rish burchagi 107 darajali obyektiv qo‘llanilgan.
Pixel 4a 5G hamda Pixel 5 smartfonlarining old kameralari 8 megapikselli; unga F/2,0 diafragmali va ko‘rish burchagi 83 daraja bo‘lgan obyektiv biriktirilgan. Selfi-kamera soniyasiga 30 kadr tezligida Full HD video yoza oladi; bosh kamera 60 kadr/soniya tezligida 4K-video yozib olishga qodir.
Ikkala modelning mushtarak jihatlaridan yana quyidagilarni sanab o‘tish kerak: 128 gigabaytli doimiy xotira; stereofonik karnaylar; 18 vattli tezkor quvvatlash; USB 3.1 Gen 1 Type-C porti; Wi-Fi 802.11ac, Bluetooth 5.0+LE hamda NFC modullari.
Farqlari
Pixel 5 modelining OLED-ekrani diagonaliga 6 dyuym bo‘lib, 2340x1080 pikselli aniqlikda tasvir uzata oladi. Kadr yangilanish chastotasi 90 gers bo‘lgan displey yuzasiga Gorilla Glass 6 himoya shishasi yotqizilgan.
Pixel 4a 5G smartfonida ham OLED-matritsa qo‘llangan, lekin uning o‘lchami diagonaliga 6,2 dyuymga teng. Displeyning chastotasi oddiy, tasvir uzatish formati 2340x1080 pikselli; uning muhofazasi uchun Gorilla Glass 3 shishasi qo‘llangan.
Har ikkala smartfonda ham tezkor xotira uchun LPDDR4 toifali chiplar qo‘llangan, lekin Pixel 5 modelida uning hajmi 8 gigabayt bo‘lsa, Pixel 4a 5G devaysida 6 gigabayt.
Pixel 5 modelining alyuminiydan ishlangan korpusi IP68 darajasida himoyaga ega. Google unga uchta mikrofon o‘rnatgan, biroq 3,5 millimetrli standart quloqchin tirqishi qo‘ymagan. Smartfonning 4000 mA/soatli akkumulyatoriga simsiz quvvatlanish va reversiv zaryadka (boshqa devayslarga quvvat berish) texnologiyalari joriy etilgan.
Pixel 4a 5G korpusi esa polikarbonatdan ishlangan, unda ikkita mikrofondan tashqari standart quloqchin tirqishi ham qo‘llangan. Bu smartfonning 3800 mA/soatli batareyasida simsiz quvvatlanish xususiyati yo‘q.
Pixel 5 korpusining o‘lchamlari 144,7x70,4x8,0 millimetrli bo‘lib, 151 gramm tosh bosadi. Pixel 4a 5G modelida esa bu ko‘rsatkichlar tegishlicha 153,9x74,0x8,2 millimetr va 168 grammga teng.
Bu ikki smartfonga bag‘ishlab quyida rasmiy videolavha tayyorlandi:
Yevropa bozorida Pixel 5 uchun 630 yevro so‘rashadi, AQShda esa uni 700 dollardan sotishadi. Pixel 4a 5G esa ushbu bozorlarda tegishlicha 500 yevro hamda 500 dollarga baholangan. Har ikkala smartfon uchun allaqachon oldindan buyurtmalar olinmoqda, ularning ochiq savdosi esa 15-oktabrdan boshlanadi.
Mavzuga doir: Barcha yangi iPhone 12’lar narxi oshkor qilindi
Izoh (0)