Apple компанияси 13 октябрь куни ўтказилган тақдимотида HomePod mini «ақлли» колонкасини тақдим этди. Ҳамёнбоп ва ихчам қурилмани 6 ноябрдан бошлаб 100 доллар эвазига буюртма қилиш мумкин, деб хабар беради IXBT.
HomePod сифатли аудиотизим билан бирга, овозни кўтаришга ёрдам берадиган S5 процессори базасида яратилган. Apple HomePod mini овозли тизимини Computational audio деб атаган — сониясига юз маротабадан ортиқ ҳисобланган товуш автоматик равишда оптималлаштирилиб, сифатли овозни тақдим этади. Агарда битта HomePod mini’нинг сифати етмаса, иккинчисини харид қилиб, улардан стереожуфтлик ҳосил қилиш мумкин.
HomePod mini UWB (Ultra Wideband) алоқали U1 чипини қўллаб-қувватлайди — компания унга катта умид билдирмоқда. UWB’ни яқин орада iMac’дан тортиб Apple Watch’гача бўлган барча қурилмалар қўллаб-қувватлашни бошлайди. Хусусан, ҳозирда Apple Watch Series 6’да UWB мавжуд.
Табиийки, HomePod mini Siri овозли ёрдамчисига эга бўлиб, у анча тезлашган. Интерком номли янги функция турли фойдаланувчилар турли HomePod mini’лар орқали ўзаро мулоқот қилишига имкон беради. Масалан, ота-оналар меҳмонхонадаги HomePod mini орқали болани кечки овқатга чақириши мумкин, бунда «таклиф» боланинг хонасидаги HomePod mini орқали етказилади. Интерком функцияси Apple’нинг бошқа қурилмалари — iPhone смартфонлари ва ҳатто CarPlay тизими орқали ишлай олади. Шунингдек, HomePod mini ёрдамида «ақлли» уй тизимини бошқариш мумкин.
Аввалроқ Apple iPhone 12’ни тақдим этгани, линейкадаги барча смартфонлар 5G алоқа тармоғини қўллаб-қувватлаши тўғрисида хабар берилганди.
Изоҳ (0)