Dori-Darmon kompaniyasi 2019-yilni 48,3 milliard so‘m zarar bilan yakunlaganini e’lon qildi

Dori-Darmon aksiyadorlik kompaniyasi 2019-yilni 48,3 milliard so‘m zarar bilan yakunladi. Bu haqda 17-sentabr kuni bo‘lib o‘tgan aksiyadorlarning yillik umumiy yig‘ilishida ma’lum qilindi, deya xabar bermoqda “Gazeta.uz”.

Taqqoslash uchun, kompaniyaning 2018-yildagi zarari 56,2 milliard so‘mni tashkil etgan. Shu bilan birga, 2017-yil 10,4 milliard so‘m, 2016-yil esa 28,5 milliard so‘m miqdoridagi foyda bilan yakunlangan.

Yig‘ilishida 2014–2016-yillarda aksiyadorlar (ularning vorislari, merosxo‘rlari) tomonidan talab qilinmagan dividendlarni Dori-Darmon uchun daromad sifatida qabul qilingan umumiy qiymati 8,95 milliard so‘mni kompaniya tasarrufida qoldirish to‘g‘risida qaror qabul qilindi.

Bundan tashqari, kompaniyaning kuzatuv kengashining yangi a’zolari quyidagi tarkibda tasdiqlandi:

• Shorahmetov Shohrux Shoturg‘unovich – sog‘liqni saqlash vazirining o‘rinbosari;
• Rizayev Kamol Saidakbarovich – Vazirlar Mahkamasi kotibiyat mudiri;
• Yusupaliyev Bahodir Qahramonovich – sog‘liqni saqlash vazirining o‘rinbosari, Sanitariya-epidemiologiya va aholi salomatligi xizmati boshlig‘i;
• Jumanazarov Yunusbek Rahimboyevich – Iqtisodiy rivojlanish va kambag‘allikni qisqartirish vazirligi bosh boshqarmasi boshlig‘i;
• Tugizbayev A’zam Abduraimovich – Davlat aktivlarini boshqarish agentligining bosh mutaxassisi;
• Azimov Dilshod Abduhakimjon o‘g‘li – Monopoliyaga qarshi qo‘mita bo‘limi boshlig‘i;
• Shohidoyatov Kamoliddin Sirojiddinovich – National Investments MChJ direktori;
• Mustafoyev Zafar Bo‘riboyevich – “O‘zbek Lizing Xalqaro” AJ bosh direktori;
• Fayziyev Mirmasud Solihovich – Vessel Pharma MChJ loyiha direktori.
• Solihboyeva Umida Saidovna 2019-yil fevral oyidan buyon rahbarlik qilib kelayotgan Dori-Darmon tarmog‘i boshqaruvi raisi lavozimini saqlab qoldi.