Toshkent viloyati yuqumli kasalliklar shifoxonasining bosh shifokori — viloyat bosh infeksionisti Guljahon Yo‘ldoshevaga nisbatan qo‘llanilgan qamoqqa olish ehtiyot chorasi o‘zgartirilib, uy qamog‘iga o‘tkazilgan kuni (6-oktabr) shifoxonaning boshqa infeksionisti — Shixnazar Ro‘zmetov qamoqqa olindi, deya ma’lum qilmoqda “Xabar.uz”
Unga ko‘ra, Shixnazar Ro‘zmetovga Jinoyat kodeksining 116-moddasi 3-qismi (shaxsning og‘ir oqibatga sabab bo‘ladigan darajada o‘z kasbiga nisbatan beparvoligi yoki insofsizlik bilan munosabatda bo‘lishi) va 228-moddasi (hujjatlarni soxtalashtirish) bilan ayb e’lon qilinib, 2020-yilning 6-oktabr kuni Jinoyat ishlari bo‘yicha Chirchiq shahar sudi ajrimi bilan qamoqqa olish ehtiyot chorasi qo‘llangan.
Qayd etilishicha, e’lon qilingan asosiy ayblov (116-moddasi 3-qismi) ehtiyotsizlik oqibatida sodir etilgan jinoyatlar sirasiga kiradi. Ayni ayblov sudda tasdiqlangan taqdirda ham eng katta jazo besh yilgacha ozodlikdan mahrum etish ekani inobatga olinsa, qo‘llangan ehtiyot chora katta savol tug‘diradi.
Chunki ehtiyotsizlik oqibatida sodir etilgan jinoyatlar bo‘yicha besh yildan ortiq jazo tayinlanishi ehtimoli bo‘lgan taqdirdagina shaxsga nisbatan qamoqqa olish chorasi qo‘llanishi mumkinligi Oliy sud Plenumi qarorida alohida qayd etilgan.
Avvalroq JIB Chirchiq shahar sudi Toshkent viloyati yuqumli kasalliklar shifoxonasining bosh shifokori G.Yo‘ldoshevaga nisbatan qo‘llanilgan hibsga olish to‘g‘risidagi ehtiyot chorasini uy qamog‘iga o‘zgartirish kiritilganda uning “ayol ekani, olti nafar voyaga yetmagan farzandning onasiligi” e’tiborga olingan edi.
E’tiborli jihati, Sh.Ro‘zmetov ham deyarli G.Yo‘ldosheva singari maqomda. Xususan, Ro‘zmetov kasalxonada endigina shifokor sifatida ish boshlagan. Bundan tashqari u ikki nafar voyaga yetmagan farzandning (ikkinchi farzandi endigina bir oylik bo‘lgan) otasi, oilaning yagona boquvchisi hisoblanadi.
Yuqoridagi jihatlar inobatga olinsa, Ro‘zmetovga nisbatan qamoqqa olish ehtiyot chorasini qo‘llash qay darajada to‘g‘ri?
Eslatib o‘tamiz, Guljahon Yo‘ldosheva 6-oktabr kuni uy qamog‘iga o‘tkazildi. Bundan avval Oliy Majlis Senati raisi Tanzila Norboyeva 2-oktabr kuni Guljahon Yo‘ldoshevaga qo‘llanilgan ehtiyot chorasiga munosabat bildirib, uning ayol kishi ekanligi va kichkina bolasi borligini e’tiborga olib, hozircha qamoqqa olmaslik mumkinligini aytgandi.
Mahalla va oilani qo‘llab-quvvatlash vazirligi Guljahon Yo‘ldosheva bilan 3-oktabr kuni Ombudsman huzuridagi milliy preventiv mexanizm (MPM) doirasida suhbat tashkil etilgani, vazirlik Guljahon Yo‘ldoshevaning qamoqqa olinganidan tashvishdaligini bildirgandi.
Prezident Shavkat Mirziyoyevning to‘ng‘ich qizi — Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, gender tenglikni ta’minlash masalalari bo‘yicha komissiya a’zosi Saida Mirziyoyeva 5-oktabr kuni viloyat bosh infeksionisti bilan bog‘liq ishni kuzatib borayotganini ma’lum qildi hamda prokuraturadan Guljahon Yo‘ldoshevaga nisbatan qamoqqa olish ehtiyot chorasini o‘zgartirishni so‘rab chiqdi.
Bosh prokuratura 6-oktabr kuni Guljahon Yo‘ldoshevaga qo‘llanilgan hibsga olish to‘g‘risidagi ehtiyot chorasini uy qamog‘iga o‘zgartirish masalasi Chirchiq prokuraturasi tomonidan ko‘rib chiqilayotganini ma’lum qildi.
Sog‘liqni saqlash vazirligi esa Bosh prokuratura mazkur ish bo‘yicha qamoqqa olish ehtiyot chorasi uy qamog‘iga o‘zgartirilishi kutilayotganini ma’lum qilib bo‘lganidan keyin prokuratura idoralaridan Guljahon Yo‘ldoshevaga nisbatan boshqa ehtiyot chorasini tanlash masalasini ko‘rib chiqishni so‘radi.
Izoh (0)