“Lutfulla To‘rayevni zaxira olganimizdan so‘ng o‘yinimiz to‘xtab qoldi”. Vadim Abramov Eronga qarshi o‘yindagi mag‘lubiyatdan so‘ng nimalar dedi?

O‘zbekiston terma jamoasi bosh murabbiyi Vadim Abramov Eron terma jamoasiga qarshi kechgan o‘rtoqlik uchrashuvidan (1:2) keyin o‘z fikrlari bilan o‘rtoqlashdi.

Eron tajribali jamoa ekani barchaga tushunarli. O‘z imkoniyatimizdan pastroq daraja o‘ynadik, bizdan yaxshi o‘yin kutishgandi. Birinchi bo‘limda o‘yinimiz biroz chiqmagan bo‘lsa, ikkinchi bo‘limning so‘nggi 30 daqiqasida afsuski, juda yomon o‘ynadik. Eron birinchi bo‘limda bir marta zarba berdi va gol urdi. Bu ularning tajribali jamoa ekanini ko‘rsatadi. Afsuski, bu o‘yinda yaxshi ko‘rinmadik. Ayni damda qaysi bosqichda turganimizni bilib olish uchun shunday kuchli raqibga qarshi o‘yin kerak edi. Anchadan beri ko‘rmagan futbolchilarni sinab oldik. Bu bahs biz uchun foydali bo‘ladi, mag‘lub bo‘lganda futbolchilarga aytadigan gaplarim ko‘p bo‘ladi.

Har bir jamoa raqib imkoniyatidan kelib chiqib harakat qiladi. Dastlabki daqiqalarda raqibdan cho‘chib, ortdan o‘ynadik. Keyinchalik vaziyatni o‘z qo‘limizga oldik va yaxshi yurishlar qildik. Mazkur imkoniyatlarda sovuqqonlik va xotirjamlik bilan foydalanganimizda edi... Afsuski, uzatmalarda xato qildik, Eron jarima maydoniga bunday uzatmalar bilan kirib bo‘lmaydi.

Sardor Azmunning golida himoyachilar pozitsiyani yo‘qotdi? U mahoratlik futbolchi. Aytganimdek, tarkibimiz 3 kun avval to‘liq yig‘ildi. Shu sabab himoyachilarimiz yo‘l qo‘yadigan bunday xatolar — birgalikdagi o‘yinning yetishmasligidan. O‘sha vaziyatda oddiy xatoga yo‘l qo‘ydik. Raqib to‘pni qabul qilib olgan vaqtda atrofida shuncha o‘yinchi bo‘la turib unga xotirjam to‘pni o‘nglash va tepish imkoniyatini berib qo‘ydik. Bu, albatta, Azmunning mahorati va himoyachilarimizning bolalarga xos xatolari sabab yuz berdi.

Adashmasam, Osiyo Kubogi—2011 musobaqasida o‘ynagan futbolchilardan hozirda faqat Lutfulla To‘rayev qoldi. U haqida juda ko‘plab tanqidlar bo‘lishini bilaman. Bu o‘yin orqali unga qay darajada ishonch bildira olishimizni ko‘rib olmoqchi edik. Uni zaxiraga oldik va o‘zingiz ko‘rganingizdek, o‘yinimiz to‘xtab qoldi. Maydon markazida ulkan “teshik” paydo bo‘ldi. Zaxira almashtirishlari o‘yinni kuchaytira olmadi.

Vadim Abramov, O‘zbekiston terma jamoasi bosh murabbiyi