O‘zbekistonda COVID-19 kasalligiga chalingan bemorlarni davolashda “Remdesivir” va “Favipiravir” dori vositalaridan foydalanilmoqda. Bu haqda Sog‘liqni saqlash vazirligi ma’lum qildi.
Vazirlik tomonidan xabar berilishicha, mamlakatda pandemiya sharoitida yuzaga kelishi mumkin bo‘lgan dori-darmon taqchilligining oldini olish maqsadida davlat tomonidan qator choralar ko‘rilmoqda. Avvalo, hududlarda yetishmovchilik kuzatilayotgan dori-darmonlar aniqlanib, ularni yetkazib berish masalalari hal etilmoqda. Hozirda ushbu dori vositalarining 24 milliard so‘mlik zaxirasi shakllantirilib, ayni paytgacha poliklinikalar orqali 300 ming to‘plam dori qutilari aholiga tarqatilmoqda.
Qayd etilishicha, hozirda jahon tibbiyotida koronavirus infeksiyasini davolash uchun “Remdesivir” va “Favipiravir” dori vositalari keng qo‘llanilmoqda. O‘zbekiston Prezidentining topshirig‘iga asosan, aholini aynan shunday preparatlar bilan ta’minlashga alohida e’tibor qaratilmoqda.
Sog‘liqni saqlash vazirligi xabariga ko‘ra, hozirga qadar kasallikning boshlang‘ich bosqichidagi bemorlar uchun 17 ming nafar bemorga mo‘ljallangan 17 ming dona “Favipiravir” va og‘ir holatdagi 2500 nafar bemorga mo‘ljallangan 15 ming dona “Remdesivir” dori vositasi davolash muassasalariga bepul yetkazib berildi.
Ta’kidlanishicha, O‘zbekistonda ham ishlab chiqarilishi yo‘lga qo‘yilayotgan “Remdesivir” preparati bilan aholini ta’minlash qisqa vaqt ichida bir necha barobarga oshirilishi kutilmoqda.
Shuningdek, ayni paytgacha maktab o‘qituvchilari uchun 4 million 715 ming dona tarkibida koronavirusga qarshi samarali bo‘lgan sink mikroelementi mavjud preparatlar yetkazib berildi.
“Davlat rahbari tomonidan har oy shu kabi dori vositalari turkumini respublika shifoxonalariga uzluksiz yetkazib berish bo‘yicha tegishli topshiriqlar berilgan”, — deyiladi vazirlik xabarida.
Eslatib o‘tamiz, “Remdesivir” Yevropa Ittifoqida ruxsat olish uchun tavsiya qilingan koronavirusga qarshi ilk dori vositasi hisoblanadi. Janubiy Koreya ham 1-iyuldan boshlab “Remdesivir” dori vositasini sotib olishni boshlagandi. O‘zbekistonda ham profilaktika, kasallikning yuqishini oldini olish maqsadida ishlatish mumkin bo‘lgan dorilar qatorida “Remdesivir” bor. JSST “Remdesivir”ni koronavirusga qarshi kurashda “umid uyg‘otuvchi” dori vositasi deb atagan. Preparat koronavirus ko‘payishini bloklash xususiyatiga ega ekanligi kanadalik olimlar tomonidan aprel oyida aniqlangandi. AQSh “Remdesivir” preparatining deyarli barcha zaxirasini sotib olayotganini ma’lum qilgandi.
Avvalroq Sog‘liqni saqlash vaziri Alisher Shodmonov O‘zbekistonga 200 ming qadoq Yaponiyada ishlab chiqarilgan “Avigan” (“Favipiravir”) dori vositasi keltirilganini bildirgandi.
Izoh (0)