Tojikiston yetti oylik tanaffusdan keyin Xitoy bilan doimiy aviaqatnovlarni qayta tiklamoqda. Oktabr oyidan Dushanbe—Urumchi yo‘nalishidagi reyslar tiklanadi. Bu haqda Tojikiston Fuqaro aviatsiyasi agentligiga tayanib, Asia Plus xabar berdi.
Ma’lum qilinishicha, reyslarni qayta tiklash haqidagi qaror respublika shtabi tomonidan qabul qilingan va parvozlar koronavirus pandemiyasi bilan bog‘liq barcha sanitariya-gigiyena me’yorlariga amal qilgan holda amalga oshiriladi.
Xabar berilishicha, yo‘lovchilar soniga bog‘liq ravishda Dushanbe—Urumchi yo‘nalishi bo‘yicha to‘g‘ridan to‘g‘ri reyslar ikki haftada bir marta Tojikistonning Somon Air aviakompaniyasi va Xitoyning China Southern Airlines aviakompaniyasi tomonidan amalga oshiriladi. Yo‘lovchilar samolyotga chiqishdan oldin ularda koronavirus yo‘qligini ko‘rsatuvchi PZR testining ko‘pi bilan 72 soat oldin berilgan natijasini taqdim etishi kerak bo‘ladi.
Dushanbedan Urumchiga amalga oshiriladigan birinchi reysning sanasi ma’lum qilinmagan, biroq reysning oktabr oyi o‘rtasida amalga oshirilishi kutilmoqda.
Agentlik rahbarining ma’lum qilishicha, Tojikiston hukumati Dushanbe va Toshkent o‘rtasidagi to‘g‘ridan to‘g‘ri aviaqatnovlarni tiklash masalasini ham ko‘rib chiqmoqda.
Bundan tashqari, 8-oktabrdan boshlab Dushanbe—Istanbul—Dushanbe yo‘nalishida doimiy parvozlarni amalga oshirish boshlanadi.
Avvalroq Tojikistonda O‘zbekiston bilan chegaralarni ochish masalasi ko‘rib chiqilayotgani haqida xabar berilgandi.
Izoh (0)