Yangiyo‘lda begonaga tegishli avtomobilda ikki piyoda urib ketib, voqea joyidan qochgan 18 yoshli fuqaro qo‘lga olindi

Toshkent viloyati Yangiyo‘l tumanida Spark avtomobili haydovchisi, 2002-yilda tug‘ilgan fuqaro ikki kishini urib yubordi, deya xabar qilmoqda YHXBB.

Qayd etilishicha, Yangi yo‘l tumanida 2020-yil 1-oktabr tungi soat 01:00 larda to‘ydan chiqqan 2002-yilda tug‘ilgan yigit butunlay boshqa odamga tegishli bo‘lgan Spark rusumli transport vositasini “Vatan” MFY Obod ko‘chasida boshqarib ketayotgan vaqtda yo‘lning chetida ketayotgan ikki nafar ayolni urib yuboradi va ularga yordam ko‘rsatmay voqea joyidan qochib ketadi.

Jabrlangan ayollardan biri holatni quyidagicha izohladi.

“Sherigim bilan ikki kishi bo‘lib yo‘lning chetida ketayotgan edik. Bu narsa tez sodir bo‘ldi bilmay ham qoldik. Orqamizdan kelib urib ketdi. So‘ng nariroqda to‘xtadi. Men yordam so‘rasam, sizlarga kim yordam beradi, deb chirog‘ini ham yoqmasdan ketib qoldi.

Voqea sodir bo‘lgan joyga yaqin bo‘lgan fuqarolar jabrlanuvchilarni shifoxonaga olib borishadi. Ularni qabul qilgan shifokorlar tuman ichki ishlar bo‘limiga bu haqda xabar beradi va tumanda to‘sib ushlash tadbiri e’lon qilinadi.

Tezkor surishtiruvlar natijasida 18 yoshli yigit va transport vositasi tuman IIBga olib kelindi. Ammo YTH sodir etgan fuqaro tomonidan transport vositasining shikastlangan old peshoynasi va oldi tomon chiroqlari almashtirilib, ta’mirlangani aniqlandi.

IIBga olib kelingan ayblanuvchi bo‘lib o‘tgan voqea to‘g‘risida quyidagilarni bayon qildi.

“Taxminan soat 01:00 larda to‘ydan qaytayotganimda “Vatan” mahallasida yo‘lda ikkita ayolni urib yubordim. To‘xtab qarasam hamma yer qon ekan. Qo‘rqib ketib, nima qilishni bilmay qochib ketdim. Qilgan ishimdan pushaymonman”, – deydi ayblanuvchi.

Mazkur holat yuzasidan belgilangan tartibda jinoyat ishi ochilgan.