Ichki ishlar vazirligining Yo‘l harakati xavfsizligi bosh boshqarmasi internetda tarqalgan davlat raqamlari o‘xshash Matiz hamda Spark bilan bog‘liq vaziyatga izoh berdi.
Boshqarma izohiga ko‘ra, 2020-yilning 3-oktabr kuni ijtimoiy tarmoqda “Matiz qoidabuzarlik sodir etdi. Jarima Spark’ga yuborildi” sarlavhasi ostidagi xabar tarqalgan.
“Ushbu xabar o‘rganilganda 2020-yilning 14-sentabr kuni soat 07:58 da 40 Q 844 OA davlat raqam belgili Matiz haydovchisi Toshkent shahar, Sag‘bon ko‘chasi yo‘nalishida chizilgan yo‘l chizig‘i talabiga rioya etmaganligi aniqlangan.
Mazkur qoidabuzarlik yuzasidan fuqaro Z.D.ga tegishli bo‘lgan 40 Q 844 QA davlat raqam belgili Spark haydovchisiga chora ko‘rish uchun fuqaro Z.D.ning yashash manziliga jarima solish to‘g‘risidagi qaror yuborilgan.
Ayni vaqtda ushbu qoidabuzarlik yuzasidan fuqaro Z.D.ga nisbatan belgilangan jarima solish to‘g‘risidagi qaror belgilangan tartibda bekor qilingan”, — deyiladi YHXBB axborotida.
Avval davlat raqamlari o‘xshash bo‘lgan Lacetti hamda Cobalt bilan bog‘liq vaziyat bo‘yicha izoh berilgan, ushbu holatda ham ikkala mashina Farg‘ona viloyatida yashovchi fuqarolarga tegishli edi.
Izoh (0)