Янгийўлда бегонага тегишли автомобилда икки пиёда уриб кетиб, воқеа жойидан қочган 18 ёшли фуқаро қўлга олинди

Тошкент вилояти Янгийўл туманида Spark автомобили ҳайдовчиси, 2002 йилда туғилган фуқаро икки кишини уриб юборди, дея хабар қилмоқда ЙҲХББ.

Қайд этилишича, Янги йўл туманида 2020 йил 1 октябрь тунги соат 01:00 ларда тўйдан чиққан 2002 йилда туғилган йигит бутунлай бошқа одамга тегишли бўлган Spark русумли транспорт воситасини «Ватан» МФЙ Обод кўчасида бошқариб кетаётган вақтда йўлнинг четида кетаётган икки нафар аёлни уриб юборади ва уларга ёрдам кўрсатмай воқеа жойидан қочиб кетади.

Жабрланган аёллардан бири ҳолатни қуйидагича изоҳлади.

«Шеригим билан икки киши бўлиб йўлнинг четида кетаётган эдик. Бу нарса тез содир бўлди билмай ҳам қолдик. Орқамиздан келиб уриб кетди. Сўнг нарироқда тўхтади. Мен ёрдам сўрасам, сизларга ким ёрдам беради, деб чироғини ҳам ёқмасдан кетиб қолди.

Воқеа содир бўлган жойга яқин бўлган фуқаролар жабрланувчиларни шифохонага олиб боришади. Уларни қабул қилган шифокорлар туман ички ишлар бўлимига бу ҳақда хабар беради ва туманда тўсиб ушлаш тадбири эълон қилинади.

Тезкор суриштирувлар натижасида 18 ёшли йигит ва транспорт воситаси туман ИИБга олиб келинди. Аммо ЙТҲ содир этган фуқаро томонидан транспорт воситасининг шикастланган олд пешойнаси ва олди томон чироқлари алмаштирилиб, таъмирлангани аниқланди.

ИИБга олиб келинган айбланувчи бўлиб ўтган воқеа тўғрисида қуйидагиларни баён қилди.

«Тахминан соат 01:00 ларда тўйдан қайтаётганимда «Ватан» маҳалласида йўлда иккита аёлни уриб юбордим. Тўхтаб қарасам ҳамма ер қон экан. Қўрқиб кетиб, нима қилишни билмай қочиб кетдим. Қилган ишимдан пушаймонман», – дейди айбланувчи.

Мазкур ҳолат юзасидан белгиланган тартибда жиноят иши очилган.