Shavkat Mirziyoyev 5-oktabr kuni Tojikiston prezidenti Emomali Rahmon bilan telefon orqali muloqot qildi, deb xabar bermoqda Prezident matbuot xizmati.
Qayd etilishicha, suhbat avvalida davlat rahbari Tojikiston prezidentini tug‘ilgan kuni bilan tabriklab, unga mustahkam sog‘lik, farovonlik va yangi muvaffaqiyatlar tiladi.
Tojikiston tomoni koronavirusga qarshi kurashda ko‘rsatilgan amaliy yordam uchun minnatdorlik bildirdi.
Davlat rahbarlari o‘tgan oyda bo‘lib o‘tgan qator ikki tomonlama tadbirlarning samarali natijalarini yuqori baholadi. Xususan, hukumatlararo komissiyaning navbatdagi majlisi hamda biznes-forum, ilmiy-amaliy konferensiya, parlament a’zolari va ziyolilar uchrashuvlari muvaffaqiyatli o‘tkazildi, qo‘shma ishlab chiqarish quvvatlari va ijtimoiy obyektlar ochildi.
Mavzuga doir:
Shuningdek, xalqaro siyosat va mintaqaviy hamkorlikning dolzarb masalalari yuzasidan ham fikr almashildi.
Telefon muloqoti so‘ngida Shavkat Mirziyoyev Emomali Rahmonga 2020-yil 11-oktabr kuni bo‘lib o‘tadigan prezident saylovi muvaffaqiyatli o‘tishini tiladi.
Ma’lumot uchun, Tojikistonning amaldagi prezidenti Imomali Rahmon mamlakatni 1994-yildan beri uzluksiz boshqarib kelmoqda. Dushanbeda 26-avgust kuni bo‘lib o‘tgan Tojikiston Mustaqil kasaba uyushmalari federatsiyasining navbatdagi qurultoyida Emomali Rahmon prezidentlik sayloviga nomzod sifatida ilgari surilgan. Uning to‘ng‘ich o‘g‘li Rustam Emomali 17-aprel kuni Majlisi milliy (Tojikiston parlamenti yuqori palatasi) spikeri etib saylangandi. Ayni paytda u 32 yoshda. 2016-yilda mamlakat konstitutsiyasiga o‘zgartirish kiritilgan bo‘lib, prezidentlikka nomzodning yoshi 35 yoshdan 30 yoshgacha qisqartirilgan. Bu unga navbatdagi prezident saylovlarida ishtirok etish imkonini beradi.
Avvalroq Dushanbeda 14—15-sentabr kunlari Shavkat Mirziyoyev va Emomali Rahmonning o‘zbek-tojik munosabatlarini mustahkamlashdagi o‘rni muhokama qilingani, 28–29-sentabr kunlari Tojikiston va O‘zbekiston o‘rtasida savdo-iqtisodiy, ijtimoiy-madaniy hamkorlik masalalari bo‘yicha qo‘shma qo‘mitaning navbatdagi Majlisi bo‘lib o‘tgani xabar berilgandi.
Izoh (0)