Jondor tumani hokimi: Tumanimiz “qoniqarsiz” deb topilishiga asosiy sabab — e’tiborsizligimiz

Buxoro viloyatining Jondor tumani Prezident Shavkat Mirziyoyev raisligida bo‘lib o‘tgan videoselektor yig‘ilishida 33 ta “qoniqarsiz” tumanning biri sifatida tilga olingandi. Xalq deputatlari tuman kengashining navbatdagi sessiyasida tuman hokimi hududning “qoniqarsiz” ahvolga tushganiga izoh berdi, deya xabar berdi “Daryo” muxbiri.

Jondor tumani hokimi Kamol Kamolov sessiyada so‘z olib, tuman rahbari sifatida hududning iqtisodiy ko‘rsatkichlarini 2020-yil oxirigacha yaxshilab, “o‘rta”, keyingi yilda esa “yaxshi”ga o‘tkazishga va’da berdi.

Hokimga ko‘ra, tumanning iqtisodiy salohiyati 23 ta yo‘nalish bo‘yicha tahlil qilingan va shundan 9 ta yo‘nalishda kamchiliklar borligi aniqlangan. Hokim tumanning “qoloq”ligini ko‘rsatkichlar va qilingan ishlar davlat statistika qo‘mitasiga berilmay qolgani bilan izohladi.

“Tumanning ‘qoniqarsiz’ hududga tushib qolishiga asosiy sabablardan biri bu — e’tiborsizlik. Men va o‘rinbosarlarim qayd etilayotgan ko‘rsatkich va raqamlar Davlat statistika qo‘mitasida qanday aks etayotgani bilan qiziqmaganmiz. Natijada statistikada ikki xil raqam aks etgan. Birgina eksport borasidagi anglashilmovchilikka e’tibor qarataylik. O‘tgan yil tumanda 8 million dollar miqdorida eksport amalga oshirilgan. Ammo statistikada boshqa raqam qayd etilgan. Bu esa qilingan ishlar hajmini ‘nol’ga chiqargan. Mana shunday e’tiborsizligimiz va hisobotni nazorat qilmaganimiz sababli vaziyat shu darajaga yetdi”, — dedi Kamol Kamolov.

Tuman hokimi “Daryo” muxbirining “Tuman ‘qoniqarsiz’lar ro‘yxatiga tushib qolishiga sizning ham aybingiz bor. Hokim sifatida qanday kamchiliklarga yo‘l qo‘ydim deb o‘ylaysiz? Qo‘l ostingizdagilarga qay darajada ishondingiz va qaysi soha xodimlari sizga pand berdi?” degan savoliga “Tumanimizni ijtimoiy-iqtisodiy rivojlantirish yo‘lida mavjud imkoniyatlarimizni ishga solib, bor kuch-g‘ayratimiz bilan barcha sektor rahbarlari, tuman faollari, deputatlar bilan birgalikda ishlarni to‘g‘ri tashkillashtirib, baholashning reyting ko‘rsatkichlariga ko‘ra, ‘qoniqarsiz’lar ro‘yxatidan ‘o‘rta’ga o‘tkazib, sizlarning va davlatimiz rahbarining ishonchini oqlaymiz. Hokim sifatida belgilab berilgan vazifalar va tavsiyalar o‘z vaqtida hamda to‘liq ijro etilishiga va’da beraman”, — dedi.

Sessiyada so‘z olgan viloyatning sobiq hokimi, viloyat kengashi deputati Samoydin Huseynov tumanning “qoniqarsiz”lar ro‘yxatiga tushib qolganini sharmandalik, deb atadi.

“Gapirmayman degandim, ammo ichimda qolib ketganimdan ko‘ra aytganim ma’qulroq bo‘lsa kerak. Jondor tumani nega respublikada ‘qoloq’ tumanlar safidan o‘rin oldi? Bu holatni shaxsan men sharmandalik, deb baholayman. Chunki Jondor xalqi mehnatkash, hunarmand, dehqonchilikda peshqadam. Imkoniyatlari cheksiz bo‘lgan hudud. Tumanning shunday holatga tushishi sabablarini chuqurroq tahlil qilish kerak. Xafa bo‘lmaysizlar, hatto, o‘zim ham uyalib turibman. Bugungi sessiyada hech biringizning javobingizdan qoniqish hosil qilmadik. Vaziyat faqat o‘zini oqlash bilangina o‘tkazildi. E’tibor bermagan ekanmiz, statistika bunday qilibdi, u bunday qilibdi, degan gaplar aytildi. Bunaqa bo‘lishi mumkin emas. Bugungi sessiyaning vazifasi juda katta. Sessiyada tik turgan sektor rahbarlari bundan keyin rahbarlik qila oladimi yoki yo‘qmi, shuni ochiq aytishi kerak. Sessiyaning asosiy maqsadi ham mana shu. Hatto chora-tadbirlar dasturi ham to‘g‘ri tuzilmagan. Bu ahvolda natijaga erishib bo‘lmaydi”, — dedi Samoydin Huseynov.

Shundan so‘ng Jondor tumani hokimi Kamol Kamolov bugundan boshlab o‘zgarishini aytib, “qoniqarsiz” tuman uchun aholidan uzr so‘radi.

“To‘g‘risi, rahbarlarni ayash, andisha qilish tumanni shu ahvolga soldi. Endi rahbarlarga nisbatan talabchanlik bo‘ladi. Bugundan to‘nimizni teskari kiyib ishni davom ettiramiz. Sessiyamizda Oliy Majlis Qonunchilik palatasi vakili bor. Aytilayotgan har bir gapimiz yozib borilmoqda. Agar va’dalarim quruq gap bo‘lib qolsa, men ham, qo‘l ostimdagi xodimlar ham lavozimimiz bilan javob berishga tayyormiz!”, — dedi hokim.