1994-yil 4-oktabrda Shveysariyada “Quyosh ibodatxonasi ordeni” a’zolarining ommaviy o‘z joniga qasd qilish harakati sodir bo‘lgan edi. “Daryo” voqea tafsilotlari haqida hikoya qiladi.
Jasadlar gilamlarda cho‘zilib yotar, erkaklarning jasadlari qizil va qora rangli marosim liboslarida, ayollarning jasadlari, shu jumladan, 12 yoshli qizaloq ham tilla va oq rangli liboslarda edi. Bir vaqtning o‘zida 48 kishi halok bo‘ldi. 25 kishi Granj-syur-Salvan shahridagi ikkita uyda o‘zini yoqib yubordi, yana 23 kishi Sheyridagi uyda o‘zini o‘zi yoqdi, bu yerda olov kerakli darajada alangalanmadi. Shuning uchun bu yerda hatto astrologiya haqidagi xaotik ma’ruzaning lenta yozuvi ham saqlanib qoldi. Bu ma’ruza, ehtimol, odamlarni o‘z hayotidagi so‘nggi harakatga undashi kerak edi.
Biroz tarix
1307-yilda Fransiya qiroli Filipp IV tamplierlarga qarshi tergov boshlashga qaror qildi. Bir paytlar “Masihning kambag‘al ritsarlari” bo‘lgan tamplierlar bu paytga kelib o‘zlarining yer va oltinga to‘la qasrlariga ega bo‘lgan qudratli tashkilotga aylanib ulgurgan edi. Mish-mishlarga ko‘ra, bu qasrlar nafaqat boyliklarni saqlash uchun qurilgan, balki bu yerda ularga boylik va kuch bergan iblis va qora kuchlar sharafiga ibodatlar uyushtirilgan edi.
Butun Yevropa bo‘ylab tamplierlarni hibsga olish boshlandi, ularning mulklari tortib olindi, o‘zlari qamoqqa tashlandi va ba’zilari gulxanda yoqildi. Inkvizitorlar, ayniqsa, Fransiyada juda quturib ketdi. 1310-yil 12-aprel kuni bu mamlakatda bid’atchilikda ayblangan tamplierlar ordenining 54 a’zosi gulxanda yoqib yuborildi.
“Quyosh ibodatxonasi ordeni”
XX asrga kelib, yuqoridagi ushbu voqea Lyuk Jure va Jozef Di Mambrolarni “Quyosh ibodatxonasi ordeni” mazhabi haqidagi ta’limotni yaratishga ilhomlantirgan deb hisoblashadi, uning asosiy g‘oyasi o‘zini o‘zi yoqish orqali najot topish edi. Quyosh ta’limotining nazariy asoslarini bastakor Mishel Tabachnik taqdim etdi. Ushbu sektaning mohiyati dunyo oxirining yaqinlashib kelishiga “to‘g‘ri” tayyorgarlik ko‘rishda edi.
Buning uchun Yerdan Saturn sayyorasiga o‘tish kerak va u yerdagi tanlanganlar bilan yangi hayotga qayta tug‘ilish kerak edi. Saturnga ko‘chish esa faqatgina o‘z-o‘zini yoqish orqaligina amalga oshiriladi, deb qarashardi. Ammo shveysariyalik tergovchilar aniqlashicha, boshqacha bo‘lishi ham mumkin ekan.
Masalan, tergovchilar sektadagilar o‘zlarini o‘ldirish uchun tabletkalardan, o‘limga olib keladigan kokteyllardan ham foydalanganlarini va so‘nggi daqiqada “Saturnga ko‘chish” fikridan qaytganlar esa otib yoki bo‘g‘ib o‘ldirilganini aniqlagan. Ko‘plab jasadlar tanalarida o‘q izlari, ko‘krak qafasida teshilgan joylar, qo‘llari bog‘langan holda boshiga yopilgan polietilen paketlar bilan topilgan edi. Jure va Di Mambrolar oxir zamon uchun o‘zlarining neotamplierlar ordeni a’zolarini shunday tayyorlardi.
Chaqaloqning o‘limi
“Quyosh ibodatxonasi ordeni”ning asosiy magistri belgiyalik neo-natsist va qora sehr-joduni sevuvchi Lyuk Jure edi. U o‘z ta’limoti g‘oyalarini ko‘plab sirli va diniy tashkilotlarning a’zosi bo‘lgan Aleister Krouli asarlaridan oldi. Natijada ushbu orden ta’limoti xristian o‘ziga xosligi (nasroniylikning irqchi va antisemit talqini), NUJ dini (yerdan boshqa yerlardagi hayotga ishonish) va masonlik g‘oyalariga yo‘g‘rilgandi.
Lyuk Jure va Jozef Di Mambroning diniy tadqiqotlari o‘z natijasini 1994-yilda bera boshladi. Shu yilning oktabr oyida ularning muridlaridan biri o‘zining uch oylik o‘g‘lini yog‘och qoziq bilan o‘ldirdi. Aytishlaricha, ushbu muridiga bunday qotillikni Di Mambroning o‘zi buyurgan edi. Go‘yoki u uch oylik bolada o‘zining ma’naviy maqsadiga erishishiga to‘sqinlik qilish uchun yer yuzida paydo bo‘lgan Dajjolni ko‘rgan emish.
Firibgarlar ishga chuqur kirib ketganida...
Mazhabning asoschilari ham o‘z joniga qasd qildi. Biroq ularning alohida boshqa sabablari bor edi. Tergov aniqlashicha, Jure va Mambrolar kun kelib o‘z mulklaridan mahrum etilgan “orden” a’zolari tomonidan ta’qib qilinishdan qo‘rqa boshladi. “Apokalipsis” haqidagi asl haqiqat shunda ediki, “Quyosh ibodatxonasi” o‘z a’zolaridan xayr-ehson qilishni talab qilardi, shuning uchun ham sektaga juda boy odamlar qabul qilindi. Jure va Mambrolar esa bu mulklarni o‘z nomlariga o‘tkazib oldi.
Aytgancha, ularning muridlari nafaqat Shveysariyada, balki Fransiya va Kanadada ham mavjud edi. Quyosh ordeni ushbu davlatlarda ham faoliyat yuritgan va guruh bo‘lib, o‘z joniga qasd qilishlar bu mamlakatlarda 1990-yillarning oxiriga qadar davom etgan edi. Shu bilan birga, sektada o‘z ko‘lami bilan fantastik darajaga yetgan sirli moliyaviy firibgarliklar sodir bo‘lardi. A’zolarning uylaridan tortib qurol-yarog‘ savdosigacha bo‘lgan ushbu moliyaviy firibgarliklarning barchasi “orden” rahbarlarining millionlab dollarlik shaxsiy ishlari edi.
Siriusga sayohat
1994-yilning 4-oktabriga kelib, Quyosh ibodatxonasi ordeni a’zolarining ommaviy o‘zini o‘zi yoqib yuborishlari boshlandi, buning natijasida Di Mambro, uning maslakdoshi Lyuk Jure va yana 46 ta izdoshi vafot etdi. Aftidan, ularning hammasi ham Siriusga o‘z xohishi bilan ketmagandi – ba’zi jasadlarda zo‘ravonlik natijasidagi o‘lim izlari topildi. Ordenning so‘nggi marosimi qurbonlari nafaqat kattalar, balki bolalar ham edi. Ulardan biri Di Mambroning o‘n ikki yoshli qizi bo‘ldi.
Izdoshlar
Quyosh ibodatxonasi ordeni haqidagi voqea shu bilan tugamadi va 1995-yil dekabrda mazhabning qolgan a’zolari Siriusga ko‘chib o‘tish uchun yana bir marta o‘z joniga qasd qildi – bunda yana 16 kishi vafot etdi. 1997-yil mart oyida ordenning beshta a’zosining yana o‘zini o‘zi yoqish marosimi uyushtirildi. Maxsus xizmatlar buni to‘xtatib qolishga muvaffaq bo‘ldi. 1998-yilda esa Quyosh ordenining yana 32 ta izdoshi Teyde vulqoni tepasida o‘zlarini yoqishni rejalashtirayotgani ma’lum bo‘ldi. Bu odamlar ularni olib ketishga uchar likopcha uchib keladi va qutqarilganlarning hammasini Siriusga eltadi, deb umid qilgan, ammo oxir-oqibat bu yerda Interpolning paydo bo‘lishi “parvoz” ning bekor qilinishiga olib keldi.
Albatta, bu insonlar, aslida, shunchaki ruhiy nosog‘lom odamlar bo‘lsa kerak. Turli xil diniy sektalar yordamida odamlarni aldab, firibgarlik yo‘llari bilan ularning mulkiga ega chiqish tarixda ko‘p uchraydi. Masalan, 2000-yilning 17-mart kuni Ugandadagi “Xudoning o‘n ilohiy amrini qayta jonlantirish harakati” deb nomlangan sekta a’zolari bo‘lgan 500 kishi ham o‘zlarini o‘ldirgan edi. Ammo bu endi umuman boshqa hikoya...
Nurbek Alimov tayyorladi.
Izoh (0)