Fransiya hukumati 5-oktabr, dushanba kuni Parijda va unga tutash hududlarda koronavirus bo‘yicha maksimal xavfni e’lon qiladi, deb xabar bermoqda “Kommersant”. Yangi cheklovlar haqida Parij meri Ann Idalgo ishtirokidagi matbuot anjumanida e’lon qilinishi kutilmoqda.
AFP ma’lumotlariga ko‘ra, barlar yopiladi, restoranlar esa sanitariya choralariga rioya qilgan holda ishlashi mumkin. Oliygohlar talabalarning faqat yarmini qabul qila oladi. Cheklovlar 15 kun amalda bo‘ladi.
4-oktabr kuni Fransiyada so‘nggi sutkada 16 972 kishi koronavirusga chalinib, kunlik kasallanish bo‘yicha rekord yangilangani xabar berilgan edi. Mamlakatda epidemiya boshlanganidan buyon koronavirus aniqlanganlar soni 606 625 kishini tashkil qilgan.
Avvalroq Fransiyada koronavirus bilan kasallanish holatlari soni to‘rt baravar oshgani haqida xabar berilgandi. Fransiya sog‘liqni saqlash vaziri Olivye Veran COVID-19 tarqalishi bilan bog‘liq vaziyat yomonlashayotgani sababli mamlakat aholisini ijtimoiy munosabatlarni kamaytirishga chaqirgan.
Ma’lumot uchun, pandemiya boshidan buyon dunyo bo‘yicha koronavirusga chalinganlar soni 35 million kishidan oshdi.
Izoh (0)