Fransiyada so‘nggi sutkada 16 972 kishi koronavirusga chalinib, kunlik kasallanish bo‘yicha rekord yangilandi. “RBK”ning yozishicha, bu haqda mamlakat Sog‘liqni saqlash vazirligiga bo‘ysunuvchi Santé Publique France agentligi ma’lum qilgan.
Unda qayd etilishicha, mamlakatda epidemiya boshlanganidan buyon koronavirus aniqlanganlar soni 606 625 kishini tashkil qilgan.
Avvalroq iqtisodiyot sohasidagi Alfred Nobel mukofoti nomzodlari Ester Dyuflo va Abxijit Banerji Fransiya rasmiylari katoliklarning rojdestvo bayramidan oldin butun mamlakat bo‘ylab o‘zini izolyatsiya qilish rejimini joriy qilishlari kerakligini aytgan.
Iqtisodchilarning fikriga ko‘ra, bayramdan oldin cheklovlar joriy etish iqtisodiyotga salbiy ta’sir ko‘rsatadi, ammo qariyalar va surunkali kasalliklarga ega keksalarni bayramdan keyin kasalxonaga yotqizishga to‘g‘ri kelsa, undan ham kattaroq xarajatlarning oldini olish mumkin.
Mamlakatda kunlik kasallanish bo‘yicha avvalgi antirekord 24-sentabr kuni qayd etilgan, shu kuni 16096 kishida COVID-19 aniqlangan.
Avvalroq Fransiyada koronavirus bilan kasallanish holatlari soni to‘rt baravar oshgani haqida xabar berilgandi. Fransiya sog‘liqni saqlash vaziri Olivye Veran COVID-19 tarqalishi bilan bog‘liq vaziyat yomonlashayotgani sababli mamlakat aholisini ijtimoiy munosabatlarni kamaytirishga chaqirgan. Shuningdek, vazir koronavirus tarqalish xavfi yuqori bo‘lgan hududlarda ish beruvchilarga ish rejimini masofaviy tashkil qilishni tavsiya etgan. Bunday hududlar qatoridan Bordo, Lill, Nitssa, Parij va Tuluza shaharlari o‘rin olgan.
Izoh (0)