Qashqadaryo viloyatida 31 nafar fuqaro ko‘p miqdordagi neft mahsulotlarini o‘g‘irlash va talon-toroj qilishda, shuningdek, huquqni muhofaza qiluvchi organ xodimiga pora berib, sheriklik qilishda ayblanmoqda. Bu haqda mazkur ishni ko‘rib chiqayotgan Jinoyat ishlari bo‘yicha Qashqadaryo viloyat sudi majlisida qatnashgan “Daryo” muxbiri xabar berdi.
Ma’lum bo‘lishicha, 2019-yil 14-noyabr kuni soat 22:30 da Muborak tumani “Sariq” mahallasi hududida fuqaro B.N. boshqaruvidagi “KAMAZ-5410” rusumli yuk avtomashinada 30 million 739 ming 600 so‘mlik 26800 kilogramm hamda shu kuni soat 23:30 da Buxoro viloyatiga harakatlanib ketayotgan X.Sh., N.T.larning boshqaruvidagi “Sinotruk Hohan” rusumli yuk avtomashinasida 46 million 774 ming 600 so‘mlik 40780 kilogramm tegishli hujjatlari bo‘lmagan neft xomashyosi DXX viloyati boshqarmasi va IIB xodimlari tomonidan qo‘lga olingan.
Tergovga qadar tekshiruvda B.N. va boshqalar ichki ishlar organlari xodimlari rahnamoligi ostida yashirin ravishda “Muborak neft va gaz qazib chiqarish” boshqarmasiga qarashli “Shimoliy O‘rtabuloq” konidan Muborak tumani hududidagi neft qabul qilish estakadasiga boruvchi “219 dm.li” quvurning 35 kilometrini teshish orqali ko‘p miqdordagi neft xomashyosini o‘g‘irlik yo‘li bilan talon-toroj qilgani aniqlangan.
2019-yil 19-noyabr kuni mazkur holat bo‘yicha prokurori o‘rinbosari A.Mirzayev rahbarligida tergov-tezkor guruhi tuzilgan va 2020-yil 7-fevraldan tergov harakatlari olib borilmoqda.
Ta’kidlanishicha, mazkur jinoyat ishida Muborak tumani IIB boshlig‘ining birinchi o‘rinbosari S.M. ham ayblangan va unga nisbatan qamoq ehtiyot chorasi qo‘llanilgan. Mazkur jinoyat ishida ayblanayotgan 31 nafar shaxsning 10 nafariga qamoq ehtiyot chorasi qo‘llanilgan.
“Tergov xulosasida 31 nafar shaxsga 140 tonnaga yaqin neft mahsulotini o‘g‘irlash va yuz millionlab davlatga zarar keltirish aybi qo‘yilgan. Biroq ayblanuvchilardan 69 tonna neft mahsuloti olib, hujjatlashtirilgan”, — deydi mazkur jinoyat ishida ayblanayotgan IIB mas’ulining advokati Oybek Rahimov.
Izoh (0)