Toshkent viloyatining Qibray tumanida uch yil avvalgi bosqinchilik jinoyati fosh etildi, deb xabar bermoqda IIV huzuridagi Tergov departamenti.
Ma’lum bo‘lishicha, 2017-yil 24-may kuni Qibray tumani, “Yangiobod” QFYda yashovchi 35 yoshli ayol L.P. o‘ziga avvaldan tanish bo‘lgan U ismli shaxs bilan ko‘chada uchrashib, so‘ng uni uyiga taklif qilib, birgalikda tamaddi qilgan. Shundan so‘ng U ismli shaxs stol ustida turgan bolg‘a bilan L.P.ning yelka qismiga urib, yuvinish xonasiga olib kirgan va yuziga urib, tan jarohati yetkazgani, bo‘ynidan bo‘g‘gani sababli ayol xushini yo‘qotgan.
Bundan foydalangan U ismli shaxs L.P.ning uyidan narxi 400 dollarga teng HP rusumli noutbuk, 100 000 so‘mlik Nokia-1600 rusumli uyali telefon apparati va 300 dollarga teng Samsung Galaxy Tab-3 planshetini qo‘lga kiritib, hodisa joyidan yashiringan.
Holat yuzasidan Qibray tumani IIB huzuridagi Tergov bo‘limi tomonidan Jinoyat kodeksining 164-moddasi 2-qismi “a” bandi (bosqinchilik) bilan jinoyat ishi qo‘zg‘atilgan. Dastlabki tergov jarayonida ushbu jinoyatni sodir etgan fuqaroning shaxsini aniqlash imkoni bo‘lmaganligi sababli jinoyat ishi Jinoyat-protsessual kodeksining 364-moddasi 1-qismi 1-bandiga (dastlabki tergovni to‘xtatish asoslari va tartibi) asosan harakatdan to‘xtatilgan.
Jinoyat ishi bo‘yicha olib borilgan tezkor-qidiruv harakatlari davomida mazkur jinoyatni sodir etgan U ismli shaxs Namangan viloyatida yashovchi 28 yoshli U.Y. ekanligi aniqlanib, u Farg‘ona viloyati Bog‘dod tumani hududida ushlangan hamda Qibray tumani IIB huzuridagi Tergov bo‘limiga olib kelingan. Jinoyat ishi bo‘yicha dastlabki tergov qayta tiklanib, U.Y. gumon qilinuvchi tariqasida jalb qilingan va protsessual tartibda ushlangan.
Hozirda dastlabki tergov harakatlari davom ettirilmoqda.
Izoh (0)