Belarus hukumati 2-oktabr kunidan boshlab mamlakatdagi barcha xorijiy ommaviy axborot vositalarining akkreditatsiyasini bekor qildi. Bu haqda Belarus Tashqi ishlar vazirligiga tayanib, “Korrespondent” xabar qildi.
Yangi tartib bo‘yicha Belarusda xorijiy OAV jurnalistlarini qayta akkreditatsiya qilish kelasi haftadan boshlanadi va frilanser jurnalistlar faoliyati xorijiy OAV manfaatlari yo‘lida tartibga solinadi.
Shuningdek, hujjatlarni elektron shaklda taqdim etish, arizalarni ko‘rib chiqish muddatini vaqtincha akkreditatsiya qilish uchun 20 kundan 5 kungacha va doimiy ravishda 60 kundan 30 kungacha qisqartirish ko‘zda tutilgan.
TIVning eslatishicha, Belarusning axborot suvereniteti xavfsizlikning muhim elementi hisoblanadi.
“Hozirgi vaziyatda biz suveren huquqimizdan foydalanishga va zarur bo‘lgan himoya choralarini, shu jumladan, yangi qoidalarni qo‘llashga majbur bo‘lmoqdamiz”, – deyiladi TIV xabarida.
Yangi reglamentning qabul qilinishi munosabati bilan 2-oktabrdan boshlab ilgari chiqarilgan akkreditatsiya kartalarining amal qilish muddati rasmiy ravishda bekor qilinadi. 5-oktabrdan boshlab akkreditatsiya komissiyasi yangi tarkibda ish boshlaydi va elektron arizalarni qabul qilish ham shu kundan boshlanadi.
Avvalroq Yevropa Ittifoqi, Buyuk Britaniya va Kanada Belarusning oppozitsiyaga qarshi zo‘ravonlik va prezidentlik saylovlari natijalarini soxtalashtirishda ayblangan yuqori martabali amaldorlariga qarshi sanksiyalar joriy etgandi.
Ro‘yxatdagi barcha shaxslarga yuqoridagi hudud va mamlakatlarga kirish taqiqlanadi, ularning Yevropa banklari va Kanadadagi aktivlari muzlatilishi mumkin.
Eslatib o‘tamiz, 23-sentabr kuni Aleksandr Lukashenko yashirincha inauguratsiya marosimini o‘tkazgan va rasman Belarus prezidenti lavozimida ish boshlagan. Bu esa mamlakatda noroziliklarning yangi to‘lqinini yuzaga keltirdi.
Shundan so‘ng Litva, Latviya, Estoniya, Slovakiya, Ukraina, Germaniya, Kanada, Polsha, AQSh, Shvetsiya, Norvegiya, Buyuk Britaniya va Yevropa Ittifoqi Lukashenkoni Belarusning qonuniy prezidenti sifatida tan olishdan bosh tortdi.
Izoh (0)