Беларусь ҳукумати 2 октябрь кунидан бошлаб мамлакатдаги барча хорижий оммавий ахборот воситаларининг аккредитациясини бекор қилди. Бу ҳақда Беларусь Ташқи ишлар вазирлигига таяниб, «Корреспондент» хабар қилди.
Янги тартиб бўйича Беларусда хорижий ОАВ журналистларини қайта аккредитация қилиш келаси ҳафтадан бошланади ва фрилансер журналистлар фаолияти хорижий ОАВ манфаатлари йўлида тартибга солинади.
Шунингдек, ҳужжатларни электрон шаклда тақдим этиш, аризаларни кўриб чиқиш муддатини вақтинча аккредитация қилиш учун 20 кундан 5 кунгача ва доимий равишда 60 кундан 30 кунгача қисқартириш кўзда тутилган.
ТИВнинг эслатишича, Беларуснинг ахборот суверенитети хавфсизликнинг муҳим элементи ҳисобланади.
«Ҳозирги вазиятда биз суверен ҳуқуқимиздан фойдаланишга ва зарур бўлган ҳимоя чораларини, шу жумладан, янги қоидаларни қўллашга мажбур бўлмоқдамиз», – дейилади ТИВ хабарида.
Янги регламентнинг қабул қилиниши муносабати билан 2 октябрдан бошлаб илгари чиқарилган аккредитация карталарининг амал қилиш муддати расмий равишда бекор қилинади. 5 октябрдан бошлаб аккредитация комиссияси янги таркибда иш бошлайди ва электрон аризаларни қабул қилиш ҳам шу кундан бошланади.
Аввалроқ Европа Иттифоқи, Буюк Британия ва Канада Беларуснинг оппозицияга қарши зўравонлик ва президентлик сайловлари натижаларини сохталаштиришда айбланган юқори мартабали амалдорларига қарши санкциялар жорий этганди.
Рўйхатдаги барча шахсларга юқоридаги ҳудуд ва мамлакатларга кириш тақиқланади, уларнинг Европа банклари ва Канададаги активлари музлатилиши мумкин.
Эслатиб ўтамиз, 23 сентябрь куни Александр Лукашенко яширинча инаугурация маросимини ўтказган ва расман Беларусь президенти лавозимида иш бошлаган. Бу эса мамлакатда норозиликларнинг янги тўлқинини юзага келтирди.
Шундан сўнг Литва, Латвия, Эстония, Словакия, Украина, Германия, Канада, Польша, АҚШ, Швеция, Норвегия, Буюк Британия ва Европа Иттифоқи Лукашенкони Беларуснинг қонуний президенти сифатида тан олишдан бош тортди.
Изоҳ (0)