Qurolli mojaroda Turkiya qo‘llab-quvvatlayotgan Ozarbayjon tomonidan qatnashish uchun Suriyadan 300 nafar jangari Turkiyaning Gazantepa shahri orqali Tog‘li Qorabog‘ga tashlandi. “RBK”ning xabar berishicha, bu haqda Fransiya prezidenti Emmanuel Makron Yevropa Ittifoqi sammitining birinchi kuni yakuniga bag‘ishlangan brifingda ma’lum qildi.
“Bu tasdiqlangan haqiqat, bu odamlarning shaxsi aniqlangan va kuzatilgan, ularning barchasi IShID terrorchilik tashkilotiga aloqador. Men buni prezident Vladimir Putin bilan muhokama qildim, u ham Rossiya shunday ma’lumotga egaligini tasdiqladi”, — degan Makron.
Fransiya prezidenti, shuningdek, Turkiyaning o‘zini tutishi NATO a’zosi sifatida nomaqbul ekanligini qo‘shimcha qilgan. Uning aytishicha, Anqara “qizil chiziq”ni kesib o‘tdi.
Eslatib o‘tamiz, Tog‘li Qorabog‘da Ozarbayjon va Armaniston o‘rtasida harbiy nizo 27-sentabr kuni qaytadan boshlandi. Har ikki tomon ham bir-birini ig‘vogarona xatti-harakatlar va vaziyatni keskinlashtirishda ayblamoqda. Har ikkala davlat hukumati qurbonlar orasida tinch aholi borligini ma’lum qilgan.
Ushbu qurolli to‘qnashuvda Turkiya Ozarbayjonni qo‘llab-quvvatlamoqda. Erdo‘g‘on 27-sentabr kuni Ozarbayjon prezidenti Ilhom Aliyevga qo‘ng‘iroq qilib, Turkiya har doimgidek bugun ham Ozarbayjonning yonida ekanini aytgan, shuningdek, “Ozarbayjonga hujum qilgan” Armanistonni qoralab, uni bosib olingan hududlarni tark etishga chaqirgan.
Armaniston 28-sentabr kuni Turkiya Ozarbayjonga janglarda qatnashish uchun mintaqaga o‘z qo‘shinlari, texnika va mutaxassislarini jalb qilganligi haqida ma’lumot bergan. Armaniston bosh vaziri jahon hamjamiyatidan Turkiyaning Qorabog‘ ishiga aralashuviga yo‘l qo‘ymaslikni so‘ragan.
Rossiya Tashqi ishlar vazirligi ham Suriya va Liviyadagi jangarilar Qorabog‘ nizosi hududiga tashlanayotganini ma’lum qilgan. Vazirlik bu ish nizolashuvchi tomonlarning qay biri tomonidan amalga oshirilayotganiga aniqlik kiritmagan.
Armaniston hukumatining ta’kidlashicha, yollanma jangarilarni Turkiya yubormoqda. Armanistonning Rossiyadagi elchisi Vardan Toganyanning so‘zlariga ko‘ra, Suriyadan Tog‘li Qorabog‘ga to‘rt mingga yaqin jangari tashlangan. Ozarbayjon prezidenti Ilhom Aliyev bu ma’lumotni rad etib, Turkiya Ozarbayjonga faqat “ruhiy-ma’naviy yordam ko‘rsatayotgani”ni qat’iy aytib o‘tgan. O‘z navbatida, Ozarbayjon Mudofaa vazirligi janglarda halok bo‘lgan Armaniston vakillari orasida “Suriya va Yaqin Sharqning turli mamlakatlaridan bo‘lgan arman millatiga mansub ko‘plab yollanma jangarilar bor”ligi haqida bayonot bergan.
Izoh (0)