Қуролли можарода Туркия қўллаб-қувватлаётган Озарбайжон томонидан қатнашиш учун Суриядан 300 нафар жангари Туркиянинг Газантепа шаҳри орқали Тоғли Қорабоғга ташланди. «РБК»нинг хабар беришича, бу ҳақда Франция президенти Эммануэль Макрон Европа Иттифоқи саммитининг биринчи куни якунига бағишланган брифингда маълум қилди.
«Бу тасдиқланган ҳақиқат, бу одамларнинг шахси аниқланган ва кузатилган, уларнинг барчаси ИШИД террорчилик ташкилотига алоқадор. Мен буни президент Владимир Путин билан муҳокама қилдим, у ҳам Россия шундай маълумотга эгалигини тасдиқлади», — деган Макрон.
Франция президенти, шунингдек, Туркиянинг ўзини тутиши НАТО аъзоси сифатида номақбул эканлигини қўшимча қилган. Унинг айтишича, Анқара «қизил чизиқ»ни кесиб ўтди.
Эслатиб ўтамиз, Тоғли Қорабоғда Озарбайжон ва Арманистон ўртасида ҳарбий низо 27 сентябрь куни қайтадан бошланди. Ҳар икки томон ҳам бир-бирини иғвогарона хатти-ҳаракатлар ва вазиятни кескинлаштиришда айбламоқда. Ҳар иккала давлат ҳукумати қурбонлар орасида тинч аҳоли борлигини маълум қилган.
Ушбу қуролли тўқнашувда Туркия Озарбайжонни қўллаб-қувватламоқда. Эрдўғон 27 сентябрь куни Озарбайжон президенти Илҳом Алиевга қўнғироқ қилиб, Туркия ҳар доимгидек бугун ҳам Озарбайжоннинг ёнида эканини айтган, шунингдек, «Озарбайжонга ҳужум қилган» Арманистонни қоралаб, уни босиб олинган ҳудудларни тарк этишга чақирган.
Арманистон 28 сентябрь куни Туркия Озарбайжонга жангларда қатнашиш учун минтақага ўз қўшинлари, техника ва мутахассисларини жалб қилганлиги ҳақида маълумот берган. Арманистон бош вазири жаҳон ҳамжамиятидан Туркиянинг Қорабоғ ишига аралашувига йўл қўймасликни сўраган.
Россия Ташқи ишлар вазирлиги ҳам Сурия ва Ливиядаги жангарилар Қорабоғ низоси ҳудудига ташланаётганини маълум қилган. Вазирлик бу иш низолашувчи томонларнинг қай бири томонидан амалга оширилаётганига аниқлик киритмаган.
Арманистон ҳукуматининг таъкидлашича, ёлланма жангариларни Туркия юбормоқда. Арманистоннинг Россиядаги элчиси Вардан Тоганяннинг сўзларига кўра, Суриядан Тоғли Қорабоғга тўрт мингга яқин жангари ташланган. Озарбайжон президенти Илҳом Алиев бу маълумотни рад этиб, Туркия Озарбайжонга фақат «руҳий-маънавий ёрдам кўрсатаётгани»ни қатъий айтиб ўтган. Ўз навбатида, Озарбайжон Мудофаа вазирлиги жангларда ҳалок бўлган Арманистон вакиллари орасида «Сурия ва Яқин Шарқнинг турли мамлакатларидан бўлган арман миллатига мансуб кўплаб ёлланма жангарилар бор»лиги ҳақида баёнот берган.
Изоҳ (0)