Fransiya prezidenti Emmanuel Makronning ma’lum qilishicha, unda Turkiyadagi suriyalik jangarilar Tog‘li Qorabog‘dagi jangovar harakatlarda ishtirok etayotgani haqida ma’lumotlar bor. Bu haqda Makron 1-oktabr kuni Bryusselga Yevropa Ittifoqi sammitiga yetib kelishi bilan ma’lum qildi, deb yozmoqda “Korrespondent.net”.
“Bizda suriyalik jangarilar Qorabog‘dagi jangovar harakatlarga qo‘shilish uchun Gazantepadagi (Turkiyadagi provinsiya — tahr.) jang maydonlarini tark etganini ko‘rsatuvchi aniq ma’lumotlar bor. Bu juda jiddiy. Yaqin soatlar ichida biz buni shu yerda, sammitda muhokama qilamiz”, — deya ma’lum qilgan Makron.
Makronning qayd etishicha, Qorabog‘dagi vaziyat jiddiy va u tomonlar tinchlik muzokaralariga qaytishi uchun barcha imkoniyatni ishga soladi.
Shuningdek, uning ta’kidlashicha, Fransiya, Rossiya va AQSh Qorabog‘ bo‘yicha qo‘shma bayonot qabul qildi hamda vaziyat bo‘yicha ma’lumot almashish yuzasidan kelishib oldi.
“Biz prezident Tramp va prezident Putin bilan zarur xulosalar qilish uchun bu vaziyat bo‘yicha barcha ma’lumotlarni almashishga kelishib oldik. YeXHTning Minsk guruhi ishtirokchilari sifatida biz vaziyatni normal holatga qaytarish va shubhasiz o‘t ochishni to‘xtatish maqsadida harakat qilyapmiz”, — deya qo‘shimcha qildi Fransiya prezidenti.
Bayonotda aytilishicha, prezidentlar zo‘ravonlik kuchayishini “eng qat’iy tartibda” qoralaydi hamda halok bo‘lganlar va jarohat olganlarning oilalariga hamdardlik bildiradi.
Fransiya, AQSh va Rossiya Tog‘li Qorabog‘ bo‘yicha muzokaralar bilan shug‘ullanadigan Minsk guruhining hamraislari hisoblandi.
Avvalroq Rossiya Tashqi ishlar vazirligi Suriya va Liviyadagi jangarilar Qorabog‘ nizosi hududiga tashlanayotganini ma’lum qilgandi. Vazirlik bu ish nizolashuvchi tomonlarning qay biri tomonidan amalga oshirilayotganiga aniqlik kiritmagan. Avvalroq janglarda chet ellik yollanma jangarilar qatnashayotgani haqida Ozarbayjon ham, Armaniston ham gapirgan.
Armaniston hukumatining ta’kidlashicha, yollanma jangarilarni Turkiya yubormoqda. Armanistonning Rossiyadagi elchisi Vardan Toganyanning so‘zlariga ko‘ra, Suriyadan Tog‘li Qorabog‘ga to‘rt mingga yaqin jangari tashlangan. Ozarbayjon prezidenti Ilhom Aliyev bu ma’lumotni rad etib, Turkiya Ozarbayjonga faqat “ruhiy-ma’naviy yordam ko‘rsatayotgani”ni qat’iy aytib o‘tgan. O‘z navbatida, Ozarbayjon Mudofaa vazirligi janglarda halok bo‘lgan Armaniston vakillari orasida “Suriya va Yaqin Sharqning turli mamlakatlaridan bo‘lgan arman millatiga mansub ko‘plab yollanma jangarilar bor”ligi haqida bayonot bergan.
Izoh (0)