Toshkent viloyati Bo‘ka tumani IIB YHXB Ma’muriy huquqbuzarlik materiallarini ko‘rib chiqish bo‘yicha inspektori, serjant Otamurod Abdullayev mashinasini jarima maydonchasidan chiqarish uchun kelgan fuqaro firibgarlik jinoyatini sodir etgani uchun bir yildan buyon qidiruvda ekanligini aniqladi va uni qo‘lga oldi. Bu haqda “Daryo”ga Toshkent viloyati IIBB YHXB axborot xizmati tomonidan ma’lum qilindi.
Xabar berilishicha, 2020-yilning 25-sentabr kuni Bo‘ka tumani IIB YHXB Ma’muriy huquqbuzarlik materiallarini ko‘rib chiqish bo‘yicha inspektori, serjant Otamurod Abdullayev o‘z nomida bo‘lgan, lekin boshqa fuqaroning boshqaruviga berilgan transport vositasini jarima maydonidan chiqarish maqsadida kelgan Shahzod Musayevning ma’lumotlarini markazlashgan kompyuter bazasiga kiritgan.
Transport vositasi egasining ma’lumotlari kompyuterdagi maxsus dastur orqali tekshirilganida, fuqaro Shahzod Musayev qidiruvda ekanligi ma’lum bo‘ldi.
Ushbu qidiruvdagi fuqaroga nisbatan Toshkent viloyati Ohangaron tuman IIB huzuridagi Tergov bo‘limi tomonidan Jinoyat kodeksining 168-moddasi 3-qismiga (firibgarlik) asosan jinoyat ishi ochilib, unga nisbatan 2019-yil 8-iyun kuni qidiruv e’lon qilingan.
Izoh (0)