Тошкент вилояти Бўка тумани ИИБ ЙҲХБ Маъмурий ҳуқуқбузарлик материалларини кўриб чиқиш бўйича инспектори, сержант Отамурод Абдуллаев машинасини жарима майдончасидан чиқариш учун келган фуқаро фирибгарлик жиноятини содир этгани учун бир йилдан буён қидирувда эканлигини аниқлади ва уни қўлга олди. Бу ҳақда «Дарё»га Тошкент вилояти ИИББ ЙҲХБ ахборот хизмати томонидан маълум қилинди.
Хабар берилишича, 2020 йилнинг 25 сентябрь куни Бўка тумани ИИБ ЙҲХБ Маъмурий ҳуқуқбузарлик материалларини кўриб чиқиш бўйича инспектори, сержант Отамурод Абдуллаев ўз номида бўлган, лекин бошқа фуқаронинг бошқарувига берилган транспорт воситасини жарима майдонидан чиқариш мақсадида келган Шаҳзод Мусаевнинг маълумотларини марказлашган компьютер базасига киритган.
Транспорт воситаси эгасининг маълумотлари компьютердаги махсус дастур орқали текширилганида, фуқаро Шаҳзод Мусаев қидирувда эканлиги маълум бўлди.
Ушбу қидирувдаги фуқарога нисбатан Тошкент вилояти Оҳангарон туман ИИБ ҳузуридаги Тергов бўлими томонидан Жиноят кодексининг 168-моддаси 3-қисмига (фирибгарлик) асосан жиноят иши очилиб, унга нисбатан 2019 йил 8 июнь куни қидирув эълон қилинган.
Изоҳ (0)