Litvaga tashrif buyurgan Fransiya prezidenti Emmanuel Makron Belarus muxolifati rahbari Svetlana Tixanovskaya bilan uchrashdi. Meduza’ning xabar berishicha, bu haqda “Pul Pervoy” Telegram kanalida ma’lum qilindi.
Svetlana Tixanovskaya Fransiya prezidentidan Aleksandr Lukashenko bilan muloqotda vositachi bo‘lishni so‘ragandi. Tixanovskaya matbuot xizmatining xabar berishicha, Makron bilan suhbatning asosiy mavzusi Belarusda yangi prezident saylovlarini tashkil etish imkoniyati bo‘ladi.
“Yevropa davlatlari Belarusda sodir bo‘layotgan voqealarga befarq qolmasliklari juda muhimdir. Fransiya eng qadimgi demokratik davlatlardan biri sifatida bizni juda yaxshi tushunadi. Shu sababli men janob Makronga asosiy maqsadimiz — bu yil bo‘lib o‘tishi kerak bo‘lgan yangi erkin va demokratik saylovlarni eslatmoqchiman”, — deya Tixanovskaya so‘zlaridan iqtibos keltirmoqda “Pul Pervoy”.
Yelisey saroyi matbuot xizmati uchrashuv tafsilotlari haqida hozircha ma’lumot bermagan.
Avvalroq Emmanuel Makron Aleksandr Lukashenkoni Belarusning qonuniy prezidenti deb hisoblamasligini ma’lum qilgan va unga iste’foga chiqishni taklif qilgandi. Bunga javoban Lukashenko “hadeb yon-atrofga qarayvermasdan, Fransiya ichki ishlari bilan shug‘ullanishni” maslahat bergan.
Eslatib o‘tamiz, 23-sentabr kuni Aleksandr Lukashenko yashirincha inauguratsiya marosimini o‘tkazgan va rasman Belarus prezidenti lavozimida ish boshlagan. Bu esa mamlakatda noroziliklarning yangi to‘lqini yuzaga keltirdi. Shundan so‘ng Litva, Latviya, Estoniya, Slovakiya, Ukraina, Germaniya, Kanada, Polsha, AQSh, Shvetsiya, Norvegiya, Buyuk Britaniya va Yevropa Ittifoqi Lukashenkoni Belarusning qonuniy prezidenti sifatida tan olishdan bosh tortdi.
Belarus muxolifati yetakchisi Svetlana Tixanovskaya Aleksandr Lukashenkoning Belarus prezidentligi lavozimiga yashirin inauguratsiyasiga bag‘ishlangan videomurojaat yo‘llab, unda o‘zini belarus xalqining yagona yetakchisi deb atadi.
Izoh (0)