Kemasini yo‘qotib qo‘ygan indoneziyalik baliqchi okeanda uch kun baliqlar uchun mo‘ljallangan qutida suzdi, deb xabar beradi Newsflare.
14-sentabr kuni Shimoliy Maluku provinsiyasida istiqomat qiluvchi 46 yoshli Udin Diman baliq tutish uchun jo‘nab ketgan. Baliqchining oilasi uni kechasi keladi deb kutgan, biroq u qaytmagan. Oradan bir sutka o‘tgach, Udinning qarindoshlari politsiyaga murojaat qilgan.
Qutqaruvchilar Udin muntazam baliq tutadigan joyni tekshirgan, biroq baliqchi topilmagan. Shunda ular qidiruv zonasini kengaytirgan va oradan ikki kun o‘tgach, och-nahor Udin topilgan. U baliqlar uchun mo‘ljallangan sariq qutida bo‘lgan.
“Hozircha Udin qanday qilib uch kun suv va ovqatsiz yashashga muvaffaq bo‘lganini bilmaymiz. Ammo uning juda omadi kelgan”, — deydi qutqaruvchilar jamoasi rahbari.
Baliqchi shifoxonaga yetkazilgan, ovqatlantirilgan va bir necha soatdan so‘ng uyiga javob berilgan. Udinning so‘zlariga ko‘ra, uning kemasi kuchli oqim domiga tushib qolgan va ag‘darilib ketgan. U qutqaruvchilar kelguncha duch kelgan qutiga tarmashib olishga muvaffaq bo‘lgan.
Izoh (0)