Nurmat Otabekov: Karantin falonchi sanada qaytar ekan, degan fikrni aylantirgandan ko‘ra cheklovlarga jiddiy e’tiborda bo‘lish kerak

Respublika maxsus komissiyasi va Koronavirusga qarshi kurash shtabi a’zosi Nurmat Otabekov 15-oktabrdan karantin tadbirlari qaytadan kuchaytirilishi, cheklov tadbirlari keskinlashishi borasidagi gap-so‘zlarga aniqlik kiritdi.

“Karantin falonchi sanada yoki mana bu kuni bo‘lar ekan, degan fikrni aylantirgandan ko‘ra o‘zimiz karantin va cheklov tadbirlariga, profilaktik tadbirlar, tibbiyot xodimlari tavsiyalariga nechog‘lik rioya etayotganligimizga jiddiy e’tiborda bo‘lishimiz kerak. Har qanday holatda ham qandaydir qaror qabul qilish uchun epidemik vaziyatga qaraladi, vaziyat jilovi qo‘lda ekan, demak, karantin va cheklov tadbirlarini keskin kuchaytirish va qattiqlashtirishga asos qolmaydi”, — deydi mutaxassis.

Birinchidan, karantin tadbirlarini aynan mana shu kundan kuchaytirishga asos bo‘ladigan birorta sababning o‘zi yo‘q. Qolaversa, koronavirus kasalligi bilan shug‘ullanish barobarida O‘zbekistonda tizim yaratildi. Sog‘liqni saqlash tizimi yetarli miqdorda dori-darmonlar, test-sistemalar, asbob-anjomlar, shifo o‘rinlari, himoya va dezinfeksion vositalar bilan yetarli miqdorda ta’minlandi. COVID-19 bilan kurashishda davlatimiz tibbiyot xodimlari xorijiy hamkasblari bilan muntazam aloqa o‘rnatdi va ilg‘or xalqaro tajribalarni respublikamiz tibbiyot amaliyotiga tadbiq etish imkoniyati yaratildi.

Ikkinchidan, fuqarolarning o‘zini va yaqinlarining sog‘ligini saqlash uchun karantin qoidalariga qat’iy rioya qilishda davom etishi asosiy o‘rin egallaydi. Respublikada karantin bekor qilingani yo‘q, u yumshatilgan, xolos. Bu davrda yo‘l qo‘yilgan mas’uliyatsizlik, ushbu kasallikga chalinish ehtimolini oshiribgina qolmasdan, ba’zi yondosh kasalligi bor odamlarda og‘ir kechib, hatto o‘limga ham olib kelishi mumkinligini unutmaslik kerak.

Odamlar gavjum bo‘ladigan joylarda (istirohat bog‘lari, dam olish maskanlari, mahalla, ko‘chalar, savdo, transport va h.k) aholi tomonidan shaxsiy himoya vositalaridan foydalanish qoidalarini buzilishi holatlariga barham berish bo‘yicha kengaytirilgan tushuntirish va nazorat tadbirlarini davom ettirish, belgilangan talablarni buzgan shaxslarga murosasiz bo‘lishimiz kerak.

Bu kabi qoidalarning buzilishiga yo‘l qo‘ygan yoki unga rioya etmayotgan odamlarga nisbatan murosasizlikni namoyish etishimiz kerak. Bu kabi holatlarning oldini olish bo‘yicha jamoatchilik nazoratini yo‘lga qo‘yishimiz kerak. Bir-birimizga tanbeh berish, aytaylik, niqobni to‘g‘ri taqib yurishni tushuntirish kabilarni doim aytishimiz kerak. Agar biz sanitariya qonun-qoidalarini buzgan har bitta shaxslarga nisbatan chorani faqat nazorat organlari ko‘radi, deydigan bo‘lsak, bu katta xato bo‘ladi. Biz bunday holatlarda bir-birimizga ozgina tanbeh berish, qilayotgan xatosi xavfini tushuntirish kabilar bilan shug‘ullanishimiz kerak.

Nurmat Otabekov, Respublika maxsus komissiyasi va Koronavirusga qarshi kurash shtabi a’zosi

Eslatib o‘tamiz, Respublika maxsus komissiyasining qaroriga binoan O‘zbekistonda 15-avgustdan boshlab karantin cheklovlari bosqichma-bosqich yumshatilgan. Xususan, avtomobillarning kun davomida harakatlanishiga, mahalliy avia va temiryo‘l qatnoviga, xususiy bog‘cha va maktablar faoliyatiga, 30 kishilik to‘ylarni o‘tkazishga ruxsat berilgan. 17-avgustdan viloyatlar o‘rtasida avtotransport qatnovi hamda jamoat transporti (metropolitendan tashqari) va shahar atrofidagi avtobus qatnovi tiklanadi, masjidlar qayta ochildi. 20-avgustdan buyum bozorlari va savdo majmualari qayta ishga tushdi.