Республика махсус комиссияси ва Коронавирусга қарши кураш штаби аъзоси Нурмат Отабеков 15 октябрдан карантин тадбирлари қайтадан кучайтирилиши, чеклов тадбирлари кескинлашиши борасидаги гап-сўзларга аниқлик киритди.
«Карантин фалончи санада ёки мана бу куни бўлар экан, деган фикрни айлантиргандан кўра ўзимиз карантин ва чеклов тадбирларига, профилактик тадбирлар, тиббиёт ходимлари тавсияларига нечоғлик риоя этаётганлигимизга жиддий эътиборда бўлишимиз керак. Ҳар қандай ҳолатда ҳам қандайдир қарор қабул қилиш учун эпидемик вазиятга қаралади, вазият жилови қўлда экан, демак, карантин ва чеклов тадбирларини кескин кучайтириш ва қаттиқлаштиришга асос қолмайди», — дейди мутахассис.Биринчидан, карантин тадбирларини айнан мана шу кундан кучайтиришга асос бўладиган бирорта сабабнинг ўзи йўқ. Қолаверса, коронавирус касаллиги билан шуғулланиш баробарида Ўзбекистонда тизим яратилди. Соғлиқни сақлаш тизими етарли миқдорда дори-дармонлар, тест-системалар, асбоб-анжомлар, шифо ўринлари, ҳимоя ва дезинфексион воситалар билан етарли миқдорда таъминланди. COVID-19 билан курашишда давлатимиз тиббиёт ходимлари хорижий ҳамкасблари билан мунтазам алоқа ўрнатди ва илғор халқаро тажрибаларни республикамиз тиббиёт амалиётига тадбиқ этиш имконияти яратилди.Эслатиб ўтамиз, Республика махсус комиссиясининг қарорига биноан Ўзбекистонда 15 августдан бошлаб карантин чекловлари босқичма-босқич юмшатилган. Хусусан, автомобилларнинг кун давомида ҳаракатланишига, маҳаллий авиа ва темир йўл қатновига, хусусий боғча ва мактаблар фаолиятига, 30 кишилик тўйларни ўтказишга рухсат берилган. 17 августдан вилоятлар ўртасида автотранспорт қатнови ҳамда жамоат транспорти (метрополитендан ташқари) ва шаҳар атрофидаги автобус қатнови тикланади, масжидлар қайта очилди. 20 августдан буюм бозорлари ва савдо мажмуалари қайта ишга тушди.Иккинчидан, фуқароларнинг ўзини ва яқинларининг соғлигини сақлаш учун карантин қоидаларига қатъий риоя қилишда давом этиши асосий ўрин эгаллайди. Республикада карантин бекор қилингани йўқ, у юмшатилган, холос. Бу даврда йўл қўйилган масъулиятсизлик, ушбу касалликга чалиниш эҳтимолини оширибгина қолмасдан, баъзи ёндош касаллиги бор одамларда оғир кечиб, ҳатто ўлимга ҳам олиб келиши мумкинлигини унутмаслик керак.
Одамлар гавжум бўладиган жойларда (истироҳат боғлари, дам олиш масканлари, маҳалла, кўчалар, савдо, транспорт ва ҳ.к) аҳоли томонидан шахсий ҳимоя воситаларидан фойдаланиш қоидаларини бузилиши ҳолатларига барҳам бериш бўйича кенгайтирилган тушунтириш ва назорат тадбирларини давом эттириш, белгиланган талабларни бузган шахсларга муросасиз бўлишимиз керак.
Бу каби қоидаларнинг бузилишига йўл қўйган ёки унга риоя этмаётган одамларга нисбатан муросасизликни намойиш этишимиз керак. Бу каби ҳолатларнинг олдини олиш бўйича жамоатчилик назоратини йўлга қўйишимиз керак. Бир-биримизга танбеҳ бериш, айтайлик, ниқобни тўғри тақиб юришни тушунтириш кабиларни доим айтишимиз керак. Агар биз санитария қонун-қоидаларини бузган ҳар битта шахсларга нисбатан чорани фақат назорат органлари кўради, дейдиган бўлсак, бу катта хато бўлади. Биз бундай ҳолатларда бир-биримизга озгина танбеҳ бериш, қилаётган хатоси хавфини тушунтириш кабилар билан шуғулланишимиз керак.
Нурмат Отабеков, Республика махсус комиссияси ва Коронавирусга қарши кураш штаби аъзоси
Изоҳ (0)