O‘zbekistonga qo‘shni davlatlardan o‘qishini ko‘chirgan shaxslarni talabalikka qabul qilishning yangi shartlari belgilandi

Fevral oyidagi qarorga ko‘ra qo‘shni davlatlardan O‘zbekistonga o‘qishini ko‘chirgan shaxslarni talabalikka qabul qilishning yangi shartlari belgilandi, deya xabar qilmoqda O‘zA.

Qayd etilishicha, Davlat qabul komissiyasining qaroriga binoan, 2019/2020-o‘quv yilida qo‘shni davlatlardagi oliy ta’lim muassasalaridan o‘qishini ko‘chirishga ruxsat berilgan fuqarolarning talabalikka qabul qilish to‘g‘risidagi hujjatlarini rasmiylashtirish istisno tariqasida quyidagi tartibda amalga oshirilishi belgilandi:

• oliy ta’lim muassasasi rektorining (filial direktorining) ushbu toifadagi fuqarolarni darslarga ishtirok etishga ruxsat berish to‘g‘risidagi farmoyishlariga muvofiq ularga to‘lov-kontrakt mablag‘larini to‘lashga ruxsat etiladi, bunda, to‘lov shartnomasida fuqaroning tegishli hujjatlari belgilangan talablar darajasida taqdim etilmagan taqdirda shartnoma bekor qilinishi qayd etiladi;
• karantin cheklovlari yakunlangach, qo‘shni davlatdagi oliy ta’lim muassasasidan fuqaroning tegishli hujjatlari muayyan oliy ta’lim muassasasiga belgilangan talablar darajasida taqdim etilgandan so‘ng fuqaroni darslarga ishtirok etishga ruxsat berilgan sanadan boshlab uni talabalikka qabul qilingan deb hisoblash to‘g‘risida oliy ta’lim muassasasi rektorining (filial direktorining) buyrug‘i rasmiylashtiriladi.

Ushbu yangi tartib faqat fevral oyidagi qarorga ko‘ra, istisno tariqasida o‘qishini ko‘chirganlarga taalluqli ekanligi, yaqinda transfer.edu.uz sayti orqali o‘qishini ko‘chirishga onlayn ariza topshirganlarga yuqoridagi qoidalarning aloqasi yo‘qligi ma’lum qilingan.

Avvalroq O‘zbekistondagi OTMlarga o‘qishni ko‘chirish bo‘yicha o‘tkaziladigan onlayn testlar grafigi e’lon qilingandi.