Февраль ойидаги қарорга кўра қўшни давлатлардан Ўзбекистонга ўқишини кўчирган шахсларни талабаликка қабул қилишнинг янги шартлари белгиланди, дея хабар қилмоқда ЎзА.
Қайд этилишича, Давлат қабул комиссиясининг қарорига биноан, 2019/2020-ўқув йилида қўшни давлатлардаги олий таълим муассасаларидан ўқишини кўчиришга рухсат берилган фуқароларнинг талабаликка қабул қилиш тўғрисидаги ҳужжатларини расмийлаштириш истисно тариқасида қуйидаги тартибда амалга оширилиши белгиланди:
- олий таълим муассасаси ректорининг (филиал директорининг) ушбу тоифадаги фуқароларни дарсларга иштирок этишга рухсат бериш тўғрисидаги фармойишларига мувофиқ уларга тўлов-контракт маблағларини тўлашга рухсат этилади, бунда, тўлов шартномасида фуқаронинг тегишли ҳужжатлари белгиланган талаблар даражасида тақдим этилмаган тақдирда шартнома бекор қилиниши қайд этилади;
- карантин чекловлари якунлангач, қўшни давлатдаги олий таълим муассасасидан фуқаронинг тегишли ҳужжатлари муайян олий таълим муассасасига белгиланган талаблар даражасида тақдим этилгандан сўнг фуқарони дарсларга иштирок этишга рухсат берилган санадан бошлаб уни талабаликка қабул қилинган деб ҳисоблаш тўғрисида олий таълим муассасаси ректорининг (филиал директорининг) буйруғи расмийлаштирилади.
Ушбу янги тартиб фақат февраль ойидаги қарорга кўра, истисно тариқасида ўқишини кўчирганларга тааллуқли эканлиги, яқинда transfer.edu.uz сайти орқали ўқишини кўчиришга онлайн ариза топширганларга юқоридаги қоидаларнинг алоқаси йўқлиги маълум қилинган.
Аввалроқ Ўзбекистондаги ОТМларга ўқишни кўчириш бўйича ўтказиладиган онлайн тестлар графиги эълон қилинганди.
Мавзуга доир:
Изоҳ (0)