Andijon viloyat IIB hamda bojxona boshqarmasi xodimlari 300 grammdan ortiq gashish giyohvand moddasini 4 ming dollarga sotayotgan marhamatlik fuqaroni qo‘lga oldi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, 2020-yilning 11-avgust kuni soat 16:00 da ichki ishlar boshqarmasi hamda bojxona boshqarmasi xodimlari ishtirokida Marhamat tumanida tezkor tadbir o‘tkazilgan. Tadbir davomida fuqaro M.Sh. Marhamat tumani hududida 323,11 gramm gashishni fuqaro Q.Y.dan olib, xolis xaridorga 4 ming dollarga sotayotgan vaqtida qo‘lga olingan.
Shuningdek, fuqaro M.Sh.ning egnidagi kiyimlari ko‘zdan kechirilganida 0,27 gramm, fuqaro M.A.ning mobil telefoni g‘ilofi ichidan 0,88 gramm hamda uning boshqaruvidagi Nexia-2 rusumli avtomashinasi salonidan 0,73 gramm gashish giyohvand moddasi aniqlangan.
Mazkur holatlar yuzasidan ushbu fuqarolarga nisbatan Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) hamda 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) bilan jinoyat ishi qo‘zg‘atilib, tergov harakatlari olib borilmoqda.
Izoh (0)