Андижон вилоят ИИБ ҳамда божхона бошқармаси ходимлари 300 граммдан ортиқ гашиш гиёҳванд моддасини 4 минг долларга сотаётган марҳаматлик фуқарони қўлга олди. Бу ҳақда «Дарё»га вилоят ИИБ ахборот хизмати хабар берди.
Маълум қилинишича, 2020 йилнинг 11 август куни соат 16:00 да ички ишлар бошқармаси ҳамда божхона бошқармаси ходимлари иштирокида Марҳамат туманида тезкор тадбир ўтказилган. Тадбир давомида фуқаро М.Ш. Марҳамат тумани ҳудудида 323,11 грамм гашишни фуқаро Қ.Ю.дан олиб, холис харидорга 4 минг долларга сотаётган вақтида қўлга олинган.
Шунингдек, фуқаро М.Ш.нинг эгнидаги кийимлари кўздан кечирилганида 0,27 грамм, фуқаро М.А.нинг мобил телефони ғилофи ичидан 0,88 грамм ҳамда унинг бошқарувидаги Nexia-2 русумли автомашинаси салонидан 0,73 грамм гашиш гиёҳванд моддаси аниқланган.
Мазкур ҳолатлар юзасидан ушбу фуқароларга нисбатан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) ҳамда 276-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) билан жиноят иши қўзғатилиб, тергов ҳаракатлари олиб борилмоқда.
Изоҳ (0)