Namangan viloyati Chortoq tumanida 2020-yil 6-avgustda yo‘qolib qolgan 15 yoshli qiz 24-avgust kuni topildi. Bu haqda Namangan viloyati IIB axborot xizmati xabar bergan.
15 yoshli qiz 6-avgust kuni soat 17:30 larda onasiga hamroh bo‘lib tuman hokimligi binosiga borgan. Onasi bino ichiga kirib ketganidan so‘ng u hech bir sababsiz noma’lum tomonga ketib qaytib kelmagan.
Qiz ota-onasining ariza va ko‘rsatmalariga asosan viloyat IIB PPX va JTSB PPXB 4-otryad xodimlari tomonidan olib borilgan qidiruv va surishtiruv ishlari natijasida 24-avgust kuni Namangan shahar 2-kichik tumanida yurgani aniqlangan. U tegishli hujjatlar asosida ota-onasiga topshirildi, deyiladi xabarda.
Shuningdek, xabarga ko‘ra IIO xodimlari tomonidan qiz va uning ota-onasi bilan profilaktik suhbat o‘tkazilgan, voyaga yetmagan farzandlar harakatiga diqqat-e’tiborni yanada oshirish lozimligi tushuntirilgan.
Avval Toshkent shahri Olmazor tumani, “Shifokor” mahallasida yashagan 1994-yilda tug‘ilgan Iskandarova Mehribonu To‘xtasin qizi 6-avgust soat 8:30 larda uyidan chiqib ketib, qaytib kelmagani va qidiruvga berilgani haqida xabar qilingan. Keyinchalik 11-avgustda Toshkent shahar IIBB ayolning topilgani, ahvoli yaxshiligi va xavotirga o‘rin yo‘qligini ma’lum qilgan.
Izoh (0)