Futbol bo‘yicha Belarus chempionatining 22-turida “Energetik-BGU” 22-avgust, shanba kuni “Smolevichi”ni qabul qildi.
Uchrashuvning 22-daqiqasida Shahboz Umarov raqib jarima maydonida ikkita himoyachi aldab o‘tdi va darvozaning yuqori burchagini aniq nishonga oldi. Oradan ko‘p o‘tmay Umarovning qanotdan amalga oshirgan uzatmasidan keyin Dushan Bakich minskliklarning ikkinchi golini urdi.
Ikkinchi bo‘lim debyutida Umarov dublini nishonlashi mumkin edi, biroq uning zarbasidan keyin to‘p darvoza ustuniga tegib qaytdi. Qaytgan to‘pni Ayk Musaxanyan bo‘sh qolgan darvozaga joylab qo‘ydi. Mehmonlar bunga 78-daqiqada kiritilgan to‘p bilan javob qaytardi. O‘yin yakunlanishi arafasida Bakich yakuniy hisobni o‘rnatdi — 4:1.
“Talabalar” ushbu g‘alabadan keyin ochkolarini 34 taga yetkazib olgan holda 5-o‘ringa ko‘tarildi. “Smolevichi” (14) esa so‘nggi o‘rinni egallab turibdi.
Belarus Oliy Ligasi
22-tur bahsi
22-avgust, shanba
“Energetik-BGU” — “Smolevichi” 4:1
Gollar: 1:0 – 22 Umarov, 2:0 – 32 Bakich, 3:0 – 53 Musaxanyan, 3:1 – 78 Makarov, 4:1 – 89 Bakich.“Energetik-BGU”: Makavchik, Svirepa, Sokol, Yudchits, Mavatu (Girs, 77), Miroshnikov, Sovpel, Nosko, Umarov, Bakich, Musaxanyan (Muhamedov, 76).
“Smolevichi”: Lazovskiy, Rodionov (Xankevich, 46), Rashenya, Halimonchik, Alibekov (Gurban, 77), Jevnerov, Demchenko, Jigero (Aleksandrovich, 66), Makarov, Shegrikovich, Lojkin.
Ogohlantirishlar: Lojkin (68), Jevnerov (72).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)