Toshkentda “tonirovka” uchun belgilangan tartibda ruxsatnoma berish jarayoni boshlandi

Toshkent shahrida 5-avgustdan boshlab transport vositalarining oynalarini qoraytirish va tusini o‘zgartirish bo‘yicha belgilangan tartibda ruxsatnoma berish jarayoni boshlandi, deya xabar bermoqda shahar IIBB matbuot xizmati.

Toshkent shahar IIBB Yo‘l harakati xavfsizligi boshqarmasining ro‘yxatdan o‘tkazish va imtihon olish bo‘limlarining quyidagi:

• Mirobod tumani, Beshkent ko‘chasi, 45-uyda joylashgan (Fayzobod) manzilida (Shayxontohur, Mirobod va Bektemir tumanlariga xizmat ko‘rsatuvchi);
• Yunusobod tumani, O.Zokirov ko‘chasi, 2-uyda joylashgan manzilda (Olmazor va Yunusobod tumanlariga xizmat ko‘rsatuvchi);
• Chilonzor tumani, Bunyodkor ko‘chasi, 118A-uyda joylashgan manzilda (Uchtepa va Chilonzor tumanlariga xizmat ko‘rsatuvchi);
• Mirobod tumani, Vodil ko‘chasi 53-uyda joylashgan (Mirobod va Mirzo Ulug‘bek tumanlariga xizmat ko‘rsatuvchi)

manzillarida transport vositalarining oynalarini qoraytirish va tusini o‘zgartirish bo‘yicha belgilangan tartibda ruxsatnoma berish jarayoni amalga oshirilmoqda.

“Hurmatli shahrimiz fuqarolari, yuqoridagi manzillarga fuqarolik pasportining asli va transport vositasini qayd etish guvohnomasining asli bilan karantin qoidalariga to‘liq rioya qilgan holda murojaat qilishingiz mumkin”, - deyiladi xabarda.