“Mening fikrim” jamoaviy murojaatlar portaliga Toshkent shahrida svetaforlarning ishlash vaqtini yana ikki soatga uzaytirish yuzasidan petitsiya joylashtirildi.
“Respublikamizda avtomobillar soni kun sayin ko‘payib borayotganini hisobga olgan holda Toshkent shahrida svetoforlar ishlash vaqtini uzaytirishni taklif etaman. Shaharning ayrim qismlarida svetoforlar soat 23:00 dan keyin ishlashdan to‘xtaydi, to‘g‘rirog‘i, faqat sariq chiroq yonib turadi. Lekin asosiy masala shundaki, hozirgi kunda aholining avtomobilda harakatlanish vaqti ham sezilarli ravishda uzaygan, hatto, karantin vaqtida ham soat 00:00 va 01:00 larda shahrimizning ko‘plab qismlarida avtomobillarning harakati yetarlicha ko‘p.
Turli baxtsiz hodisalarni oldini olish uchun svetoforlarning ishlash vaqtini 2 soatga uzaytirishni taklif etaman. Ya’ni, svetoforlar 23:00 dan emas, 01:00 dan ishlashni to‘xtashi kerak”, – deyiladi Qobiljon Rahimjonov ismli fuqaro tomonidan bildirilgan murojaatda.
Petitsiya 2020-yil 26-iyunda portalga yuklangan va ovoz berish jarayoni yana deyarli uch oy davom etadi. Hozircha ushbu taklifni yoqlab ovoz berganlar, unga qarshi chiqqanlar soni u qadar ko‘p emas.
Mavzuga doir:
- O‘zbekistonda sug‘urta muddati o‘tgan yoki texnik ko‘rikdan o‘tmagan avtomobillarni jarima maydonchasiga joylashtirmaslik taklif etildi
- O‘zbekistonda yuridik shaxslarning avtomobil haydashda malaka oshirish talabini bekor qilish taklif etildi
- Hokimlarni saylash haqidagi petitsiya 10 mingdan ortiq ovoz to‘pladi. Endi u parlament tomonidan ko‘rib chiqilishi kerak
- O‘zbekistonda to‘ylarni 30 kishilik tartibda o‘tkazishni doimiy saqlab qolish taklif qilindi
Izoh (0)