O‘zbekiston Oliy Majlisi Senati raisi Tanzila Norboyeva parlament yuqori palatasining oltinchi yalpi majlisida mamlakatdagi oliy ta’lim tizimini tanqid qildi. Bu haqda Senat axborot xizmati xabar berdi.
“Ta’lim tizimini, ayniqsa, oliy ta’limni korrupsiya illatidan butkul xalos etish lozim. Tahlillarga ko‘ra, oliy ta’limda korrupsiya holatlari deyarli barcha bosqichlarda – talabalikka qabul qilishdan tortib, o‘qish jarayonidagi sinovlar, talabalarning o‘qish joyini ko‘chirishgacha bo‘lgan bosqichlarda keng tarqalgan. Bu kabi holatlar ta’lim sifatiga salbiy ta’sir ko‘rsatibgina qolmay, mamlakatning oliy o‘quv yurtlari xalqaro reytingdagi o‘rnini ham tushirmoqda”, – dedi Senat rahbari.
Senat rahbari O‘zbekistondagi bironta ham universitet dunyoning eng yaxshi 1000 ta universiteti qatoriga kirmasligini ta’kidladi.
“Mamlakatning eng yirik o‘quv muassasasi bo‘lgan O‘zbekiston Milliy universiteti dunyo miqyosidagi 30 mingga yaqin universitetlarni o‘z ichiga olgan Webometrics global reytingida 3971-o‘rinni egallaydi. Yana bir reytingda O‘zMU 4080-o‘rinni egallaydi”, — deya ta’kidladi Senat raisi.
Oliy va o‘rta maxsus ta’lim vazirligi va Ta’lim sifatini nazorat qilish davlat inspeksiyasiga respublika universitetlarining jahon reytingidagi mavqeyi va nufuzini oshirish bo‘yicha ishlarni bajarish topshirildi.
Avvalroq Senat raisi karantin choralari bosqichma-bosqich bekor qilinishini ma’lum qilgandi.
Izoh (0)