Ўзбекистон Олий Мажлиси Сенати раиси Танзила Норбоева парламент юқори палатасининг олтинчи ялпи мажлисида мамлакатдаги олий таълим тизимини танқид қилди. Бу ҳақда Сенат ахборот хизмати хабар берди.
«Таълим тизимини, айниқса, олий таълимни коррупция иллатидан буткул халос этиш лозим. Таҳлилларга кўра, олий таълимда коррупция ҳолатлари деярли барча босқичларда – талабаликка қабул қилишдан тортиб, ўқиш жараёнидаги синовлар, талабаларнинг ўқиш жойини кўчиришгача бўлган босқичларда кенг тарқалган. Бу каби ҳолатлар таълим сифатига салбий таъсир кўрсатибгина қолмай, мамлакатнинг олий ўқув юртлари халқаро рейтингдаги ўрнини ҳам туширмоқда», – деди Сенат раҳбари.
Сенат раҳбари Ўзбекистондаги биронта ҳам университет дунёнинг энг яхши 1000 та университети қаторига кирмаслигини таъкидлади.
«Мамлакатнинг энг йирик ўқув муассасаси бўлган Ўзбекистон Миллий университети дунё миқёсидаги 30 мингга яқин университетларни ўз ичига олган Webometrics глобал рейтингида 3971-ўринни эгаллайди. Яна бир рейтингда ЎзМУ 4080-ўринни эгаллайди», — дея таъкидлади Сенат раиси.
Олий ва ўрта махсус таълим вазирлиги ва Таълим сифатини назорат қилиш давлат инспекциясига республика университетларининг жаҳон рейтингидаги мавқейи ва нуфузини ошириш бўйича ишларни бажариш топширилди.
Аввалроқ Сенат раиси карантин чоралари босқичма-босқич бекор қилинишини маълум қилганди.
Изоҳ (0)