O‘zbekiston Markaziy banki ikkinchi chorak uchun pul-kredit siyosati sharhida inflyatsiya prognozini va narxlarning pasayishiga ta’sir ko‘rsatuvchi asosiy omillar, shuningdek, inflyatsiya foniga ta’sir qilishi mumkin bo‘lgan xavf va noaniqliklar to‘g‘risida ma’lumot berdi.
“Mehnat resurslari harakatiga cheklovlarning saqlab qolinishi, logistikaning yomonlashishi, transport xizmatlari takliflarining qisqarishi, karantin talablari yana uzaytirilgan sharoitda tovarlarni tashish muddati hamda qiymati oshishi asosiy iste’mol tovarlari narxining ko‘tarilishiga olib kelishi mumkin”, — deyiladi xabarda.
Bundan tashqari, moliyaviy rag‘batlantirish, yilning birinchi yarmida kreditlash va pul massasining jadal o‘sishi yil ikkinchi yarmida ma’lum inflyatsion muhitni yaratishi mumkin. Bu esa o‘z navbatida, kreditlashning o‘sish sur’atlari hamda ilgari berilgan kreditlarni qaytarish bo‘yicha ma’lum choralar ko‘rishni talab qiladi.
Ta’kidlanishicha, pandemiya bilan bog‘liq vaziyatning davom etishi aholining asosiy iste’mol tovarlari va dori-darmonlarga bo‘lgan talabining ortib borishiga turtki beradi, bu cheklangan ta’minot sharoitida ular narxiga bosim yaratadi. Shuni inobatga olgan holda, narxlar ko‘tarilishining oldini olish uchun importni erkinlashtirish hamda soddalashtirish orqali qish—bahor mavsumi uchun ushbu turdagi tovarlar zaxirasini qayta ko‘rib chiqish va oshirish zarur.
Avvalroq DSQ O‘zbekiston aholisining umumiy daromadlari 2020-yilning dastlabki 6 oyida qanchaga o‘zgargani ma’lum qilgandi.
Izoh (0)