Toshkent viloyati Chirchiq shahrida “O‘zstandart” agentligi sobiq xodimi Yo.T. eski tanishlari S.R. va D.K.ni aldab 32,7 million so‘m pulini olgani hamda evaziga soxta hujjatlarni haqiqiy deb ishontirib ketgani ma’lum bo‘ldi. Bu haqda Tergov departamenti xabar qildi.
Xabarga ko‘ra, 2019-yil 11-maydan 2019-yil 18 oktabrga qadar bo‘lgan vaqt oralig‘ida “O‘zstandart” agentligi respublika sinov va sertifikatlashtirish markazi davlat korxonasining sobiq xodimi Yo.T. o‘ziga oldindan tanish bo‘lgan Chirchiq shahridagi xususiy tadbirkor 32 yoshli S.R. va MChJ menejeri 25 yoshli D.K.ni aldagan. Ularga o‘zini go‘yoki hali ham “O‘zstandart” agentligida ishlayotgandek ko‘rsatib, chet eldan O‘zbekiston ichki bozorida savdoga chiqarish uchun olib kelingan mahsulotlarga tegishli ruxsat beruvchi muvofiqlik-sertifikatlari hamda Sanitariya-epidemiologiya markazining xulosalarini ortiqcha ovoragarchiliklarsiz qisqa muddatlarda rasmiylashtirib berishini va’da qilgan.
Yo.T. uyidagi Toshiba noutbuki elektron xotirasida mavjud bo‘lgan agentlikning sertifikat namunalarini Paint dasturi yordamida o‘zgartirib, ularni qalbakilashtirgan. Soxtalashtirilgan ruxsat blankalarini D.Q. va S.R.ga jami 32 million 700 ming so‘m evaziga sotib, pullarni o‘zining shaxsiy ehtiyojlariga sarflab yuborgan.
Mazkur holat yuzasidan Chirchiq shahar IIB huzuridagi Tergov bo‘limi tomonidan Jinoyat kodeksining 228-moddasi 2-qismi “a” bandi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Yo.T. kodeksning 228-moddasi 2-qismi “a” bandi va 168-moddasi 3-qismi “a” bandi (Firibgarlik) bilan ayblanuvchi tariqasida jalb qilingan hamda unga nisbatan garov ehtiyot chorasi qo‘llanilgan. Jinoyat ishining ayblov xulosasi tegishliligi bo‘yicha sudga yuborilgan.
Avval Andijonda 100 ming so‘mlik qalbaki kupyuralarni bozorda muomalaga kiritmoqchi bo‘lgan shaxs qo‘lga olingani, Farg‘onada qalbaki 100 dollarni o‘tkazmoqchi bo‘lganlarga jinoyat ishi qo‘zg‘atilgani, Buxoroda Bosh prokuratura huzuridagi departament DXX xodimlari bilan hamkorlikda o‘tkazgan tadbirda soxta toshlar hamda qalbakilashtirilgan tarixiy-badiiy buyumlarni sotishga ixtisoslashgan jinoiy guruh qo‘lga tushgani, Andijon viloyatida karantin vaqtida respublika bo‘ylab erkin harakatlanish huquqini beruvchi “yashil” yo‘lak ruxsatnomasini soxtalashtirgan bir guruh shaxslar hibsga olingani haqida xabarlar berilgan.
Izoh (0)