Ўзбекистон Марказий банки иккинчи чорак учун пул-кредит сиёсати шарҳида инфляция прогнозини ва нархларнинг пасайишига таъсир кўрсатувчи асосий омиллар, шунингдек, инфляция фонига таъсир қилиши мумкин бўлган хавф ва ноаниқликлар тўғрисида маълумот берди.
«Меҳнат ресурслари ҳаракатига чекловларнинг сақлаб қолиниши, логистиканинг ёмонлашиши, транспорт хизматлари таклифларининг қисқариши, карантин талаблари яна узайтирилган шароитда товарларни ташиш муддати ҳамда қиймати ошиши асосий истеъмол товарлари нархининг кўтарилишига олиб келиши мумкин», — дейилади хабарда.
Бундан ташқари, молиявий рағбатлантириш, йилнинг биринчи ярмида кредитлаш ва пул массасининг жадал ўсиши йил иккинчи ярмида маълум инфляцион муҳитни яратиши мумкин. Бу эса ўз навбатида, кредитлашнинг ўсиш суръатлари ҳамда илгари берилган кредитларни қайтариш бўйича маълум чоралар кўришни талаб қилади.
Таъкидланишича, пандемия билан боғлиқ вазиятнинг давом этиши аҳолининг асосий истеъмол товарлари ва дори-дармонларга бўлган талабининг ортиб боришига туртки беради, бу чекланган таъминот шароитида улар нархига босим яратади. Шуни инобатга олган ҳолда, нархлар кўтарилишининг олдини олиш учун импортни эркинлаштириш ҳамда соддалаштириш орқали қиш—баҳор мавсуми учун ушбу турдаги товарлар захирасини қайта кўриб чиқиш ва ошириш зарур.
Аввалроқ ДСҚ Ўзбекистон аҳолисининг умумий даромадлари 2020 йилнинг дастлабки 6 ойида қанчага ўзгаргани маълум қилганди.
Изоҳ (0)