IIV huzuridagi Tergov departamenti Xorazm viloyati Gurlan tumanida bir ayolning “samosud” qilingani tasvirlangan video yuzasidan ma’lumot berdi.
Unga ko‘ra 24-iyul kuni soat taxminan 12:00 larda 26 yoshli I.O. tanishi 20 yoshli Y.T. ismli ayol bilan uchrashgan. Ushbu holatni I.O. ning turmush o‘rtog‘i 24 yoshli M.S.ning dugonalari ko‘rib qolib, telefon orqali bu haqda M.S.ga xabar bergan. Ayollar Y.T.ni ushlab olib, turli xil uyatli so‘zlar bilan haqorat qilgan va janjal qilgan. M.S. Y.T.ning turli joylariga urib tan jarohati yetkazgan.
Janjal vaqtida M.S.ning dugonalaridan biri uyali telefon apparati orqali videotasvirga olib, keyinchalik mazkur videoni Telegram orqali tarqatib yuborgan.
Tergov departamenti xabariga ko‘ra, mazkur holat yuzasidan Gurlan tumani IIB huzuridagi Tergov bo‘linmasi tomonidan tergovga qadar tekshiruv harakatlari olib borilmoqda.
Departament fuqarolardan yuqoridagi kabi holatlarda o‘zboshimchalik bilan harakat qilib, xato qilganlarni jazolashga urinmaslikni, belgilangan tartibda huquqni muhofaza qiluvchi organlarga murojaat qilishni so‘ragan. Bu kabi holatlar tasvirlangan videolavhalarni ijtimoiy tarmoqlarda tarqatayotgan fuqarolarga O‘zbekiston Respublikasi Ma’muriy javobgarlik to‘g‘risidagi kodeksining 189(1)-moddasi va Jinoyat kodeksining 130(1)-moddalarida ko‘rsatilgan zo‘ravonlikni yoki shafqatsizlikni targ‘ib qiluvchi mahsulotni tayyorlash, olib kirish, tarqatish, reklama qilish, namoyish etish ma’muriy va jinoiy javobgarliklarini keltirib chiqarishini eslatib o‘tgan.
Avval Samarqandda tunda uchrashuvga chiqqan yigit va qizni “samosud” qilgan fuqarolar ishi sudga oshirilgani, Qo‘shko‘pirda bir ayolni “samosud” qilganlarga nisbatan jinoyat ishi qo‘zg‘atilgani, Xorazmda ayolning “samosud” qilinishiga nima sabab bo‘lgani ma’lum qilingandi.
Izoh (0)