ИИВ ҳузуридаги Тергов департаменти Хоразм вилояти Гурлан туманида бир аёлнинг «самосуд» қилингани тасвирланган видео юзасидан маълумот берди.
Унга кўра 24 июль куни соат тахминан 12:00 ларда 26 ёшли И.О. таниши 20 ёшли Ю.Т. исмли аёл билан учрашган. Ушбу ҳолатни И.О. нинг турмуш ўртоғи 24 ёшли М.С.нинг дугоналари кўриб қолиб, телефон орқали бу ҳақда М.С.га хабар берган. Аёллар Ю.Т.ни ушлаб олиб, турли хил уятли сўзлар билан ҳақорат қилган ва жанжал қилган. М.С. Ю.Т.нинг турли жойларига уриб тан жароҳати етказган.
Жанжал вақтида М.С.нинг дугоналаридан бири уяли телефон аппарати орқали видеотасвирга олиб, кейинчалик мазкур видеони Telegram орқали тарқатиб юборган.
Тергов департаменти хабарига кўра, мазкур ҳолат юзасидан Гурлан тумани ИИБ ҳузуридаги Тергов бўлинмаси томонидан терговга қадар текширув ҳаракатлари олиб борилмоқда.
Департамент фуқаролардан юқоридаги каби ҳолатларда ўзбошимчалик билан ҳаракат қилиб, хато қилганларни жазолашга уринмасликни, белгиланган тартибда ҳуқуқни муҳофаза қилувчи органларга мурожаат қилишни сўраган. Бу каби ҳолатлар тасвирланган видеолавҳаларни ижтимоий тармоқларда тарқатаётган фуқароларга Ўзбекистон Республикаси Маъмурий жавобгарлик тўғрисидаги кодексининг 189(1)-моддаси ва Жиноят кодексининг 130(1)-моддаларида кўрсатилган зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш маъмурий ва жиноий жавобгарликларини келтириб чиқаришини эслатиб ўтган.
Аввал Самарқандда тунда учрашувга чиққан йигит ва қизни «самосуд» қилган фуқаролар иши судга оширилгани, Қўшкўпирда бир аёлни «самосуд» қилганларга нисбатан жиноят иши қўзғатилгани, Хоразмда аёлнинг «самосуд» қилинишига нима сабаб бўлгани маълум қилинганди.
Изоҳ (0)